Rymska-katalickaja carkva moža pierahledzieć mietad raźliku daty śviatkavańnia Vialikadnia, kab usie chryścijanie adznačali Uvaskrasieńnie Chrysta ŭ adzin dzień. Pra heta zajaviŭ Papa Francišak padčas sustrečy z udzielnikami III Suśvietnych rekalekcyj (duchoŭnych praktyk) dla śviataroŭ 12 červienia, pieradaje Radyjo Vatykana.
Pavodle jaho, Rymska-katalickaja carkva hatovaja abmiarkoŭvać adzinuju datu Vialikadnia, jakaja b adznačałasia «u Rymie, Kanstancinopali i Maskvie». «Sustrakajucca katalik i pravasłaŭny i pytajuć adzin adnaho: «Tvoj Chrystos užo uvaskros? Moj — za tydzień», — iranična zaŭvažyŭ pantyfik.
Zhodna z katalickim kalendarom, data Vialikadnia raźličvajecca na padstavie pieršaha soncastajańnia paśla poŭni ŭ sakaviku. U pravasłaŭnych raźlik bolš składany. Jak praviła, roźnica dat katalickaha i pravasłaŭnaha Vialikadnia składaje tydzień, ale časam moža adroźnivacca i na miesiac. Niaredka daty Vialikadnia supadajuć.
Papa nahadaŭ pra toje, što mieŭ dobryja adnosiny z pradstaŭnikami Ruskaj Pravasłaŭnaj Carkvy ŭ Arhientynie, budučy arcybiskupam Buenas-Ajresa.
Papa Francišak nazvaŭ bolš čym braterskimi adnosiny z Patryjarcham Kanstantynopala Varfałamiejem I i nahadaŭ pra namahańni Varfałamieja I na karyść supolnaha śviatkavańnia Vialikadnia pamiž pravasłaŭnymi. Śviaty Ajciec uskłaŭ vialikija spadziavańni na Usiepravasłaŭny Sabor, jaki pavinien adbycca ŭ 2016 hodzie.
Jon pastaviŭ u prykład Finlandyju, dzie pravasłaŭnaja supolnaść vyrašyła śviatkavać Paschu ŭ adzin dzień ź luteranami, «kab nie stvarać skandału padziełu».
Ideja ab abjadnańni dat Vialikadnia užo raniej ahučvałasia Franciškam, a jašče raniej pra hatoŭnaść źmianić kalandar było zajaŭlena padčas pantyfikatu Papy Paŭła VI (1963—1978).
Učora Papa padkreśliŭ, što nieabchodna pryjści da zhody ŭ hetym pytańni, a supolnym dniom śviatkavańnia Paschi moža być druhaja niadziela krasavika. «Katalicki Kaścioł jašče z časoŭ Paŭła VI hatovy ŭstanavić kankretnuju datu i admovicca ad pieršaha soncastajańnia paśla poŭni ŭ sakaviku», adznačyŭ Francišak.
Sioleta kataliki adznačali Vialikdzień 5 krasavika, pravasłaŭnyja — 12 krasavika.
