Ministr finansaŭ Hiermanii Volfhanh Šojble paśla zajavy Afin pra refierendum bolš nie bačyć nieabchodnaści ŭ dalejšych pieramovach. Pra heta paviedamlaje Deutsche Welle sa spasyłkaj na AFP.
AR
Ministr ličyć, što tym samym Hrecyja ŭ adnabakovym paradku spyniła dyjałoh. «Pieramovy byli, vidavočna, zavieršany spadarom Cyprasam — kali ja pravilna zrazumieŭ toje, što jon zajaviŭ siońnia nočču pa telebačańni i dniom u hreckim parłamiencie», — zajaviŭ Šojble. Dla dalejšych pieramovaŭ, pavodle jaho słoŭ, bolš niama padstaŭ.
Ciapier pazicyja takaja, što prahrama dapamohi Hrecyi budzie zavieršana ŭ bližejšy aŭtorak, tamu što pieramovaŭ bolš nie budzie, cytuje Šojble The Wall Street Journal. Pavodle acenki vydańnia, heta aznačaje, što FRH nie padtrymaje prapanovu padoŭžyć termin dziejańnia prahramy choć by da praviadzieńnia refierendumu. Krynica haziety, blizkaja da ŭrada Hiermanii, skazała, što kancler Anhieła Mierkiel nie budzie rekamiendavać bundestahu prahałasavać za padaŭžeńnie hetaj prahramy (uchvaleńnie hetaha rašeńnia parłamientam Hiermanii i jašče niekatorych inšych krain jeŭrazony nieabchodnaje, kab prahrama była padoŭžanaja).
Ministr finansaŭ Finlandyi Alaksandr Stub zajaviŭ, što Jeŭrahrupa nie budzie praciahvać prahramu padtrymki Hrecyi. Jon taksama ličyć, što abjaŭleńnie refierendumu pa mierach biudžetnaj ekanomii «zakryvaje dźviery» dla dalejšych pieramoŭ pa daŭhavym kryzisie. «U Jeŭrahrupy jość kansiensus, što prahrama padtrymki (kredytavańnia) nie moža być padoŭžanaja. Płan A budzie zamienieny płanam V», — cytuje jaho WSJ.
Hetyja zajavy ministry zrabili ŭ Brusieli da pačatku pasiedžańnia Jeŭrahrupy pa hrečaskim pytańni. Taki ž punkt hledžańnia vykazaŭ staršynia Jeŭrahrupy, ministr finansaŭ Niderłandaŭ Jerun Dejsiełbłum. Jon miarkuje, što, vidać, rašeńnie ŭładaŭ Hrecyi pra refierendum aznačaje, što ŭrad krainy adprečyŭ apošnija prapanovy mižnarodnych kredytoraŭ. Jaho heta zasmučaje. Pavodle jaho acenki, Hrecyja zakryła dźviery dla dalejšych pieramovaŭ, tady jak jon usio jašče ličyŭ dyskusiju mahčymaj.
Ministry finansaŭ u Brusieli buduć abmiarkoŭvać prapanovy kredytoraŭ Hrecyi pa prahramie kredytavańnia, ci budzie padoŭžany termin dziejańnia hetaj prahramy, i što rabić, kali damovicca z Afinami nie atrymajecca, paviedamiła ahienctvu Bloomberg vysokapastaŭlenaja krynica ŭ jeŭrazonie.
Premjer-ministr Hrecyi Aleksis Cypras abviaściŭ u piatnicu ŭviečary refierendum adnosna prapanoŭ mižnarodnych kredytoraŭ. Pra heta jon zajaviŭ u televizijnym zvarocie unačy ź piatnicy na subotu, pieradaje Bloomberg.
Pa słovach Cyprasa, hetyja patrabavańni źnievažajuć hrecki narod, jaki pavinien «dać svoj demakratyčny adkaz».
Hałasavańnie adbudziecca amal imhnienna, 5 lipienia.
Jak adznačyŭ Cypras, kanclerka Niamieččyny Anhieła Mierkiel i kiraŭnik Jeŭrapiejskaha Centrabanka Maryjo Drahi znajomyja ź jaho płanam pravieści refierendum.
Cypras taksama abviaściŭ, što jon budzie prasić ab padaŭžeńni najaŭnaj prahramy dapamohi, jakaja zaviaršajecca 30 červienia, na niekalki dzion z tym, kab pravieści hałasavańnie.
Raniej ŚMI paviedamili, što mižnarodnyja kredytory hatovyja dapamahčy Hrecyi pahasić daŭhi, praciahnuŭšy prahramu dapamohi jašče na 5 miesiacaŭ — pry ŭmovie, što Hrecyja budzie praciahvać prahramu strohaj ekanomii.
Adnak hrečaski ŭrad choča atrymać hrošy biez radykalnaha skaračeńnia vydatkaŭ.
Apošnija sustrečy ministraŭ finansaŭ jeŭrazony i kiraŭnikoŭ krain ES z kiraŭnictvam Hrecyi nie dali jasnaha vyniku.
Rašeńnie Cyprasa było niečakanym. U vypadku hałasavańnia hrekaŭ suprać praciahu prahramy dapamohi plebiscyt 5 lipienia moža stać tym, čym dla Biełarusi byŭ refierendum maja 1995 hoda. Jon moža stać adpraŭnym punktam dla vychadu Hrecyi ź jeŭrazony, a moža być, navat i Jeŭrasajuza, i vyznačyć kurs raźvićcia krainy na niekalki dziesiacihodździaŭ.
