fota z fejsbuka Darji Katkoŭskaj
Ajcišniku Alaksieju Kamku dali 6 hadoŭ z kanfiksacyjaj u kałonii ŭzmocnienaha režymu, jaho pryznali vinavatym pa ŭsich troch artykułach. Prysud byŭ abvieščany siońnia, 29 červienia, u sudzie Partyzanskaha rajona Minska.
Vykazvajecca zdahadka, što jaho zatrymańnie źviazana z zatrymańniem inšaha viadomaha IT-biźniesoŭca.
Alaksiej Kamok byŭ aryštavany ŭ studzieni 2014 hoda. U lutym 2015 Śledčy kamitet paviedamiŭ ab zaviaršeńni rasśledavańnia kryminalnaj spravy «ŭ dačynieńni da hramadzianina Biełarusi, 1981 h. n., jaki z 2005 pa 2012 hod zajmaŭsia niezakonnaj rekłamnaj dziejnaściu ŭ sietcy Internet», rekłamujučy «nie tolki lehalnyja tavary i pasłuhi, ale taksama i parnahrafičnyja materyjały». Pavodle infarmacyi SK, pry hetym «pradprymalnamu mužčynu», jakim byŭ Kamok, i «jaho kampańjonam» udałosia zarabić «bolš za 700 tysiač dalaraŭ». Maładomu čałavieku było pradjaŭlenaje abvinavačvańnie pa č. 2 i č. 3 art. 233 (Niezakonnaja pradprymalnickaja dziejnaść, učynienaja ŭ składzie arhanizavanaj hrupy) i č. 2 st.343 (Raspaŭsiud parnahrafičnych materyjałaŭ) KK Biełarusi, paviedamlaje Tut.by.
Alaksieja Kamka abvinavačvali ŭ:
- Utojvańni zarobku 131 tysiačy dalaraŭ na rekłamnych sajtach u 2005-2012 hadach. Pry rehistracyi ŭ płaciožnaj sistemie, jak vyśvietliła śledstva, Kamok falsifikavaŭ pašpartnyja źviestki. Kamok pryznaŭ vinu i ŭźmiaściŭ dziaržavie 356 młn rubloŭ.
- Niezakonnaj pradprymalnickaj dziejnaści i atrymańni prybytku ŭ pamiery 684 tysiačy dalaraŭ u 2006-2008 hadach praz afšor u Hibrałtary praz raźmiaščeńnie na sajtach rekłamy lekaŭ, miedycynskich preparataŭ i bijadadatkaŭ. Abarona prasiła apraŭdać Kamka praz adsutnaść składu złačynstva i dokazaŭ udziełu padsudnaha ŭ zhadanych epizodach.
- Raspaŭsiudzie parnahrafii praź dźvie spasyłki na forumie ŭ 2005 i 2008 hadach. Abarona nastojvała na adsutnaści składu złačynstva na momant publikacyi (adpaviedny zakon nabyŭ siłu ŭvosień 2008 hoda i nie maje zvarotnaj siły) i dokazaŭ udziełu padsudnaha ŭ zhadanych epizodach (spasyłku 2005 hoda naohuł nie atrymałasia znajści ŭ archivach forumu).
Pa vynikach sudovych sprečak prakuror paličyŭ vinu Kamkom pa ŭsich epizodach dakazanaj i zapytaŭ dla jaho 7 hadoŭ kałonii ŭzmocnienaha režymu. Akramia taho, jon zapatrabavaŭ spahnać z abvinavačanaha 12 młrd biełaruskich rubloŭ — sumu dachodu, atrymanaha złačynnym šlacham, ekvivalentnuju 816 tysiačam dalaraŭ.
Kamok u momant zatrymańnia zajmaŭ pasadu hiendyrektara rasijskaj kampanii «Internet-bilet», a da hetaha niekalki hadoŭ adpracavaŭ top-mieniedžaram kampanii, jakuju zasnavaŭ inšy viadomy pradprymalnik, zatrymany try miesiacy tamu pavodle padazreńnia ŭ «niezakonnaj pradprymalnickaj dziejnaści, učynienaj arhanizavanaj hrupaj». Śledstva miarkuje, što hetyja dźvie spravy ŭzajemaźviazany pamiž saboj.
Advakaty Kamka zajavili ab tym, što «ŭ chodzie rasśledavańnia spravy nie zdabyta dastatkovych i abjektyŭnych dokazaŭ, jakija paćviardžajuć dačynieńnie Kamka da inkryminavanych złačynstvaŭ». Jany prapanavali apraŭdać padabaronnaha pa šerahu epizodaŭ i pryznačyć pakarańnie, nie źviazanaje z pazbaŭleńniem voli.
U svaim apošnim słovie Alaksiej Kamok pryznaŭ vinu tolki pa adnym epizodzie. Jon skazaŭ, što «mieniedžary pa handli svabodaj» patrabavali ad jaho pastavić podpis pad patrebnymi pakazańniami. Sam jon paprasiŭ sud «ŭličyć źmiakčalnyja abstaviny» i «pryniać mudraje, spraviadlivaje i śmiełaje rašeńnie».
