Aktyvist hatovy zmahacca za najvyšejšuju dziaržaŭnuju pasadu.
30 červienia pałata pradstaŭnikoŭ pryniała datu praviadzieńnia prezidenckich vybaraŭ — 11 kastryčnika. Svoj namier udzielničać u hetaj vybarčaj kampanii ŭžo paćvierdziŭ šerah palitykaŭ. Da ich dałučyŭsia i Alaksandr Miech z Kobryna.
«Svaju kampaniju my pačali našmat raniej i adkazali na ŭsie pytańni. Kali narod pytajecca: «A chto inšy akramia Łukašenki?» — «Alaksandr Miech». «Chto jon taki?» — my dali bijahrafiju. «Čaho ad jaho možna čakać i što jon prapanuje?» — my adzinyja na siońniašni momant, u kaho jość prezidenckaja prahrama. I tut uźnikaje inšaje pytańnie: jak zrabić, kab hetaja prahrama mahła pajści ŭ žyćcio. Treba, kab byli sumlennyja i spraviadlivyja vybary. Na siońniašni momant adbyvajucca fejkavyja vybary. I ŭdzielničać u hetym fejku nie treba», — kaža Miech.
Jakim čynam patencyjny kandydat źbirajecca źmianiać situacyju?
«My prapanujem źmienu vybarčaha zakanadaŭstva i volnuju palityčnuju prastoru — najpierš vypuścić usich palitviaźniaŭ». Kali heta nie budzie vykanana, Miech źbirajecca «prosta źviartacca da ludziej nie ŭdzielničać u hetych vybarach. A kaho zahoniać, to ŭ ich zastajecca adno — vykreślivać usich u hetych śpisach. Chto pry hetaj situacyi budzie ŭ vybarčych śpisach, źjaŭlajecca hulcom z administracyi prezidenta».
Miech, u vypadku rehistracyi kandydatam, miarkuje zdymacca, kali nie budzie sumlennych vybaraŭ. «Navošta tady ŭdzielničać u fejkavych vybarach?»
Alaksandr Miech naradziŭsia ŭ 1970 hodzie. U jaho dźvie vyšejšyja adukacyi: skončyŭ Maskoŭski dziaržaŭny ŭniviersitet hramadzianskaj avijacyi i Navapołacki dziaržaŭny ŭniviersitet. Maje dvuch synoŭ. Pracavaŭ inžynieram na «Biełtranshazie», adkul zvolnieny za ŭdzieł u parłamienckich vybarach ad apazicyi. Ciapier zajmaje pasadu namieśnika staršyni ŭ novastvoranym ruchu «Za niezaležnaść i dziaržaŭnaść Biełarusi», jaki ŭznačalvaje Uładzimir Niaklajeŭ.
