Fota: telegraph.co.uk
Z 5 žniŭnia ŭ Biełarusi budzie ŭviedzieny pryncyp «nulavoj adkaznaści» dla klijentaŭ bankaŭ — bank abaviazany viarnuć klijentu skradzienyja z rachunku hrošy. Kab atrymać hrošy, klijent musić padklučyć SMS-apaviaščeńnie — banki abaviazanyja pradastavić takuju pasłuhu. Ahlad roznych SMS-apaviaščeńniaŭ padrychtavaŭ «Biełkart», jaho pieradaje Tut.by.
U tablicy možna adšukać svoj bank i aznajomicca ź infarmacyjaj — ceny na pasłuhi, a taksama charaktar pasłuh istotna adroźnivajucca. Padrabiaznaści možna raspytać u svaim banku pa telefonie.
SMS-apaviaščeńnie adnaznačna varta padklučać, bieź jaho skradzienyja hrošy mohuć nie viarnuć. Kab padklučyć pasłuhu, treba źviarnucca ŭ bank z zajavaj.
U vypadku, kali klijent zaŭvažyŭ kradziež srodkaŭ z rachunku, jon musić źviarnucca ciaham miesiacu ŭ bank z zajavaj. Klijent moža i nie padklučać SMS-apaviaščeńnie albo admovicca ad jaho, napisaŭšy zajavu ŭ bank.
Pasłuha SMS-apaviaščeńnia kaštuje ŭ roznych bankach ad 3 da 15 tysiač na miesiac. U vypadku apłaty albo papaŭnieńnia rachunku na telefon klijenta pryjdzie SMS, pa jakim klijent zmoža daviedacca ab sumie na rachunku. Takim čynam možna zaŭvažyć, naprykład, što z rachunku źniałasia suma za pakupku, jakuju klijent nie rabiŭ.
U mnohich bankaŭ («Alfa-Bank», «BiełVEB», «Biełhazprombank», «BNB, «BSB», «BTA», «Ideabank», «Maskva-Minsk», «RRB», «Technabank», «Cepter», «Fransabank») praviły prostyja: za fiksavanuju sumu na miesiac (roznuju ŭ roznych bankach) SMS prychodziać pa lubych prychodna-raschodnych apieracyjach.
«Biełarusbank» i «Parytetbank» prapanujuć padpisacca ci tolki na prychodnyja, ci tolki na raschodnyja apieracyi (kaštuje tańniej), ci na i tyja, i tyja (daražej). U «Bielinviestbanka» ŭ dadatak da padzialeńnia na prychodnyja i raschodnyja apieracyi roznyja taryfnyja płany praduhledžvajuć roznuju kolkaść SMS na miesiac. «Biełahraprambank» prapanuje adzin taryf dla apieracyj pa Biełarusi i inšy dla SMS pa taksama i zamiežnych apieracyjach, «Trastbank» prapanuje čatyry taryfy dla roznych vidaŭ apieracyj. «BPS» pradstaŭlaje dla šerahu kartak biaspłatnyja spaviaščeńni, dla niekatorych — płatnyja. U «Pryjorbanka» płatnaja kožnaja SMS paasobku, jość pakiety SMS.
