Pytańnie nie takoje i prostaje, jak moža padacca. Voś niadaŭna ministr zamiežnych spraŭ Makiej zajaviŭ, što ułada nie dapuścić na Biełarusi nacyjanalizmu, ale čyjho? Biełaruskaha, rasiejskaha, a moža, łaoskaha? Makiej mieŭ na ŭvazie nacyjanalizm jak niešta drennaje.
Ja siabar Salihorskaj supołki TBM, u jaje ž uvachodzić i moj darosły syn Małočka Alaksandr, jakoha niadaŭna zatrymali supracoŭniki DAI Salihorska i jakomu było admoŭlena ŭ składańni pratakoła pa-biełarusku.
Historyja maje praciah. Pratakoł na Alaksandra, darečy, skłali za toje, što ŭ jaho na aŭto na pasažyrskich voknach byli tak zvanyja štorki, što dapuskajecca techrehłamientam Biełarusi. Heta pa-pieršaje. Pa-druhoje, pratakoł skłali jak za paŭtornaje parušeńnie na praciahu hoda.
U piatnicu 2 lipienia jaho vyklikali ŭ Salihorskuju DAI dla razhladu spravy. Akazałasia, što paŭtornaści niama i supracoŭniki DAI chočuć pierapisać pratakoł. Ale jany i čuć nie chočuć pra składańnie pratakoła pa-biełarusku. Adkłali razhlad — buduć dumać!
U krainie dvuchmoŭje, kažuć daišniki. A zaraz pytańnie da spadaroŭ Makieja i Trusava: ci pavinien prosty hramadzianin našaj krainy viedać abiedźvie dziaržaŭnyja movy? Ci pavinny dziaržsłužačyja, u tym liku i supracoŭniki DAI, viedać abiedźvie dziaržaŭnyja movy i nie «adfutbolvać» adnu ź ich — biełaruskuju?
Dyk ja ž sam juryst, dva dziasiatki hadoŭ addaŭ słužbie ŭ milicyi. Adkaz jasny: dziaržsłužačyja pavinny viedać abiedźvie dziaržaŭnyja movy, a prosty hramadzianin maje prava havaryć, i pisać, i čytać na luboj!
A dalej było voś što. Mnie dasłali razdrukoŭku sa staronki ŭkantakcie syna adnaho z supracoŭnikaŭ DAI, jaki składaŭ pratakoł na Alaksandra i jakomu 17 hadoŭ. Što tam napisana? Što jon «russkij». I mianie ŭraziła, što ŭ pierapiscy ź siabrami pra zatrymańnie Alaksandra hety chłopiec piša: «Najdu etoho nacionalista…» Heta piša 17-hadovy junak, syn supracoŭnika DAI, jaki pracuje na biełaruskuju dziaržavu!
U vačach hetaha chłopca Alaksandr — «nacyjanalist» (u drennym sensie) tolki za toje, što zapatrabavaŭ, kab skłali pratakoł na dziaržaŭnaj biełaruskaj movie!
Dyk jakoha «nacyjanalizmu» nie pavinna dapuścić Biełaruskaja dziaržava?