Stała viadoma, što Centrvybarkam nie zarehistruje inicyjatyŭnuju hrupu pa vyłučeńni ŭ kandydaty Alaksandra Prušynskaha. Pryčyny nazyvalisia samymi roznymi. Maŭlaŭ, u hrafa niama biełaruskaha hramadzianstva, ci narodžanyja ŭ Zachodniaj Biełarusi da 1939 hoda pryraŭnivajucca da zamiežnych hramadzian. Jak vyjaviłasia, tut nasamreč spłaŭ pieršaha i druhoha faktaraŭ.
U jurydyčnym adździele CVK «Našaj Nivie» patłumačyli, što inicyjatyŭnaja hrupa Alaksandra Prušynskaha nie moža być zarehistravana pavodle art. 57 Vybarčaha kodeksu i art. 8 zakona «Ab hramadzianstvie».
Sprava ŭ tym, što prezidentam Biełarusi moža stać tolki hramadzianin Biełarusi pa naradžeńni. Chto ž im ličycca?
Hramadzianie, jakija naradzilisia na terytoryi sučasnaj Biełarusi (tut da Prušynskaha pytańniaŭ nie ŭźnikaje, bo jon naradziŭsia ŭ majontku Vialikaja Rahoźnica na terytoryi sučasnaha Mastoŭskaha rajona), źjaŭlajucca hramadzianami SSSR pa naradžeńni i atrymali hramadzianstva Biełarusi da ŭstupleńnia ŭ siłu zakona «Ab hramadzianstvie». A voś z apošnim punktam atrymlivajecca zahvazdka. Zakon byŭ pryniaty 1 žniŭnia 2002 hoda. A hraf Alaksandr Prušynski atrymaŭ biełaruskaje hramadzianstva tolki ŭ 2007 hodzie.
Tamu, pavodle siońniašniaha zakanadaŭstva, Prušynski sapraŭdy nie moža być zarehistravany ŭ jakaści kandydata na prezidenckija vybary, ale na miascovyja, ci parłamienckija – biez prablem.
Alaksandr Prušynski ŭ kamientary dla «NN» skazaŭ, što źbirajecca abskardžvać hetaje rašeńnie ŭ sudzie. «Spačatku prakansultujusia z adnym byłym sudździoj Kanstytucyjnaha suda, a paśla budu padavać skarhu», — kaža Prušynski.
Jon havoryć, što choča stać prezidentam, «bo aptymist». «Tut možna mnoha-mnoha ŭsiaho zrabić. A našy čynoŭniki zvyklisia siadzieć na zadnicy, usie chočuć, kab za ich Alaksandr Ryhoravič zrabiŭ».
Alaksandr Prušynski naradziŭsia ŭ 1934 hodzie na Haradzienščynie. Da 1992 hoda žyŭ u Kanadzie. Paśla pierajechaŭ u Biełaruś, dzie ŭ treci raz pabraŭsia šlubam. Kaža, što na kanadskuju piensiju ŭ Biełarusi adčuvaje siabie vielmi kamfortna. Prušynski sprabavaŭ zarehistravacca kandydatam jašče ŭ 1994 hodzie. Zrešty, Prušynski – heta prosta biazzłobny dziadula-letucieńnik, jaki havoryć na cudoŭnaj biełaruska-polska-ruskaj trasiancy, a nie palityk.
* * *
Jarmošyna pra Prušynskaha: Jon čaroŭny, viasioły, aktyŭny, ale my nie možam jaho zarehistravać
