Alaksandr Łukašenka 8 lipienia padpisaŭ ukaz № 315 «Ab pieradačy va ŭłasnaść žyłych pamiaškańniaŭ dziaržaŭnaha žyllovaha fondu», paviedamlaje pres-słužba prezidenta.
Dakumient daje hramadzianam prava da 1 lipienia 2016 hoda źviarnucca pa pryvatyzacyju zaniatych imi žyłych pamiaškańniaŭ, pabudavanych za košt srodkaŭ, vydzielenych na likvidacyju nastupstvaŭ katastrofy na Čarnobylskaj AES, i dadzienych u pieryjad dziejańnia pastanovy ŭrada № 244 ad 6 maja 1995 hoda.
Zhodna z ukazam, pryvatyzavać žyłyja pamiaškańni hramadzianie buduć na płatnaj asnovie ŭ adpaviednaści z zakanadaŭčymi aktami, jakija rehulujuć pytańni pryvatyzacyi.
Pry hetym u hramadzian i členaŭ ich siemjaŭ nie pavinna być va ŭłasnaści žyłych pamiaškańniaŭ (dolej u pravie ŭłasnaści na žyłyja pamiaškańni) u nasielenym punkcie, dzie nabyvajecca žyllo. Jašče adna ŭmova dla pryvatyzacyi — nieatrymańnie dziaržaŭnaj padtrymki na budaŭnictva (rekanstrukcyju) ci nabyćcio žyłych pamiaškańniaŭ u vyhladzie lhotnaha kredytu ci adnarazovaj subsidyi.
Ukaz nabyvaje moc paśla jaho aficyjnaha apublikavańnia.
