Načalnik kalonii «Vićba-3» Vital Ahnistykaŭ nie atrymlivaŭ ad viaźnia Alaksandra Kazulina zajavaŭ pra haładoŭku. Pra heta jon paviedamiŭ 24 lutaha žurnalistam, što prybyli da kalonii.
Raniej paplečniki Kazulina raspaŭsiudzili jahonuju zajavu pra hatoŭnaść pačać suchuju haładoŭku, kali jaho nia vypuściać na chaŭtury žonki. «U vypadku kali ciaham dvuch dzion mianie nia vypuściać, z 26 lutaha ja abviaščaju suchuju haładoŭku, i tady za šeść-siem dzion nas z majoj žonkaj pachavajuć razam», — havaryłasia ŭ zajavie.
U razmovie z žurnalistami V. Ahnistykaŭ paćvierdziŭ, što paru hadzinaŭ tamu A. Kazulinu dazvolili pahavaryć pa telefonie z dočkami. Jak ćvierdzić načalnik turmy, jon pry hetaj razmovie prysutničaŭ, ale nia čuŭ nijakich zajavaŭ pra haładoŭku.
Ranicaj 24 lutaha dziažurny prakuror Respublikanskaj prakuratury Mikałaj Lavonaŭ pryniaŭ ad Volhi Kazulinaj zajavu z prośbaj dać mahčymaść Alaksandru Kazulinu prysutničać na pachavańni jaho žonki Iryny Kazulinaj, jakaja pamierła 23 lutaha.
«Dziažurny prakuror paabiacaŭ terminova davieści zajavu da hieneralnaha prakurora Ryhora Vasileviča», — ckazała Volha Kazulina. Paźniej joj stała viadoma, što zajavu pieradali ministru ŭnutranych spraŭ Uładzimieru Navumavu. Volha Kazulina nikomu z hetych aficyjnych asobaŭ nie telefanavała, pakolki była pierakananaja, što pytańnie pra vyzvaleńnie baćki nasamreč vyrašajuć nie jany.
«A jaki sens im telefanavać, kali ŭsio roŭna vyrašaje adzin čałaviek?»
Na toj momant, pavodle źviestak Volhi Kazulinaj, rašeńnie pra vyzvaleńnie Alaksandra Kazulina nibyta było pryniataje i afarmlałasia ŭ adpaviednych ustanovach.
V. Ahnistykaŭ paviedamiŭ, što rasparadžeńniaŭ nakont viaźnia Kazulina ź Miensku po-raniejšamu nie nadychodziła.
