Prezident Vieniesueły Nikałas Madura znajšoŭ srodak dla baraćby ź nizkim rejtynham i ekanamičnym kryzisam u krainie — jon vyrašyŭ zachapić dźvie traciny susiedniaj dziaržavy Hajana. Pavodle jaho słoŭ, ciapier urad rychtuje «vialikuju pieramohu». Vieniesueła ličyć, što ŭ jaje niesumlenna adabrali častku terytoryi jašče ŭ 1899 h. i ciapier samy čas adnavić histaryčnuju spraviadlivaść. The Washington Post raspaviadaje hetuju historyju.
U Vieniesuele spravy išli nie vielmi dobra jašče da taho, jak ceny na naftu ŭpali da 60 dalaraŭ za barel, ale ciapier kraina apynułasia ŭ poŭnamaštabnym kryzisie. Ciapier tam samaja vysokaja inflacyja ŭ śviecie, čerhi ŭ kramy pa samyja prostyja tavary, deficyt małaka i miedycynskich pryładaŭ dla apieracyj. Banknota samaj vysokaj vartaści ŭ sto balivaraŭ kaštuje na čornym rynku 17 amierykanskich centaŭ.
Prezident krainy Nikałas Madura apošnija niekalki dzion svaje vystupy pryśviačaje nie humanitarnamu i nie ekanamičnamu kryzisam; jon pahražaje zachapić dźvie traciny terytoryi susiedniaj Hajany — suvierennaj dziaržavy na ŭschodniaj miažy Vieniesueły. «My vierniem toje, što nam pakinuli našy prodki», - zajaviŭ jon niadaŭna.
U XIX stahodździ Hajana była brytanskaj kałonijaj. U 1895 brytancy vyrašyli pajści jašče dalej i zachapić sabie častku raki Arynoka, što nie spadabałasia ZŠA. Tady pad upłyvam Štataŭ Vieniesueła źviarnułasia ŭ mižnarodny arbitraž, jaki ŭ 1899 hodzie vyznačyŭ dziejučyja i ciapier miežy. Vieniesueła, praŭda, z 1962 hoda sprabuje ich abskardzić, choć da hetaha aficyjna hetyja miežy pryznavała i navat drukavała na svaich kartach.
Viartańniem sprečnaj terytoryi ŭ Vieniesuele budzie zajmacca tolki što stvoranaje dziaržaŭnaje ahienctva «Ministerstva pa vyratavańni Esiekiba». Esiekibo — heta samaja vialikaja raka Hajany, a terytoryja, jakuju abiacaje zachapić Madura, nazyvajecca Hajana-Esiekiba i pieravažna składajecca z džunhlaŭ i savany.
Pierš za ŭsio vieniesuelcy chočuć razdać pašparty miascovym žycharam, što žyvuć u džunhlach. Usiaho na hetaj terytoryi žyvie kala 200 tysiač čałaviek (usiaho ŭ Hajanie pražyvaje 750 tys.).
Niadaŭna Nikałas Madura abazvaŭ prezidenta Hajany Devida Hrendžera lokajem na słužbie amierykanskich naftavych kampanij i amierykanskaha impieryjalizmu. Vykazvańnie Madura źviazana z tym, što Hajana dazvoliła kampanii ExxonMobil zdabyvać naftu ŭ svaich vodach (ź Vieniesueły ExxonMobil syšła paśla taho, jak tam u 2007 hodzie nacyjanalizavali jaje majomaść). Madura abviaściŭ prybiarežnyja vody Hajany terytoryjaj Vieniesueły i zapatrabavaŭ, kab amierykanskaja kampanija vymiatałasia adtul.
