Słužba biaśpieki Ukrainy vyrašyła pravieści antyterarystyčnuju apieracyju ŭ Zakarpackaj vobłaści krainy, dzie na minułym tydni adbyłasia pierastrełka bajcoŭ arhanizacyi «Pravy siektar» z pravaachoŭnymi orhanami.
Pa słovach načalnika štaba antyterarystyčnaha centra SBU Hienadzia Kuźniacova, jakija cytujuć ukrainskija ŚMI, rašeńnie ab praviadzieńni ŭžo hatova, usie płany ŭzhodnienyja, a ŭsie nieabchodnyja srodki i siły ŭžo znachodziacca ŭ rajonie.
U svaju čarhu lidar «Pravaha siektara» Dźmitryj Jaraš zajaviŭ, što jaho ludzi hatovyja akazać supraciŭ siłavikam u vypadku, kali tyja pasprabujuć pačać šturm ich pazicyj u Zakarpaćci. Jon adznačyŭ, što nie raiŭ by siłavikam iści na taki krok.
«My ž nie barany, jakich na zaboj viaduć. Zrazumieła, kali buduć takija dziejańni, to nam daviadziecca abaraniać svaich bajcoŭ. Ja ž razumieju, što likvidacyja budzie nie tolki tam, jany pačnuć znoŭ atačać našy bazy, sprabavać razzbrojvać», — zajaviŭ Jaraš na bryfinhu, jaki tranślavaŭ ukrainski telekanał 112.
Jaraš taksama paabiacaŭ pravieści na nastupnym tydni pazapłanavy źjezd «Pravaha siektara» ŭ Kijevie. Akramia taho, lidar «Pravaha siektara» zajaviŭ, što ŭ płany arhanizacyi ŭvachodzić taksama praviadzieńnie na Majdanie masavaj akcyi, patrabavańni jakoj buduć zaćvierdžany paźniej.
