Adzin ź niečakanych udzielnikaŭ prezidenckaj kampanii — kiraŭnik Biełaruskaj patryjatyčnaj partyi (BPP) i viarchoŭny ataman «Biełaruskaha kazactva» Mikałaj Ułachovič.
Mikałaj Ułachovič prynios dakumienty ŭ CVK ŭviečary apošniaha dnia — 17 lipienia, za 15 chvilin da zakryćcia. Ale ŭ palityku, kaža jon, pryjšoŭ daŭno: jašče ŭ 1994 hodzie byŭ davieranaj asobaj Alaksandra Łukašenki na pieršych prezidenckich vybarach.
— Tady my, patryjoty, išli ahulnaj masaj, i Alaksandr Ryhoravič apynuŭsia na hałavu vyšej za nas usich, — skazaŭ Ułachovič.
Pytajem u pretendenta ab pryčynach vyłučeńnia ŭ hetym hodzie.
— Naša partyja zaŭsiody padtrymlivała liniju dziejučaha prezidenta i budzie padtrymlivać. Pryčynaj stała toje, što sioleta chočuć zładzić niejki bałahan, niejkich kocikaŭ pačali padtasoŭvać, niejkaja niezrazumiełaja palityka z boku apanientaŭ prezidenta. Nam, patryjotam, heta nieprymalna.
Ułachovič ličyć, što luby hramadzianin Biełarusi «pavinien padtrymlivać ŭładu, niezaležna ad jaho pohladaŭ, heta zakon».
Na pramoje pytańnie, ci choča lidar kazakoŭ źmianić dziejučaha prezidenta na pasadzie, pretendent adkazaŭ, što heta vyrašać vybarščyki. «Ja vyłučajusia, kab u hetaj krainie byŭ paradak, mir i spakoj», — zajaviŭ jon.
— Mianie padtrymlivajuć biełaruskija patryjoty, jakija ŭ bolšaści svajoj padtrymlivajuć uładu. Patryjoty mohuć być nie tolki na baku apazicyi. Z taho boku bačycie, kolki vystupaje? Čamu b nie vystupić dvum patryjotam źleva? Ja vystupaju na vybarach z boku ŭłady, paradku, spakoju na majoj radzimie.
U toj ža čas pretendent u prezidenty śćviardžaje, što choć i padtrymlivaje ŭładu stratehična, u jaho mohuć być taktyčnyja niazhody.
— Navošta iści na vybary, kali ty z usim zhodny? Značyć, u mianie jašče jość idei — ekanamičnyja, palityčnyja, jakija ja jašče nie raskryŭ.
Na pytańnie, ci hatovy jon źniacca z vybaraŭ na karyść dziejnaha prezidenta, lidar kazakoŭ adkazaŭ, što «situacyja pakaža», ale heta budzie rašeńnie partyi i kazactva.
Inicyjatyva jaho vyłučeńnia, śćviardžaje Ułachovič, naležała členam jaho partyi i tavaryšam pa biełaruskim kazactvu, jakija vyrašyli, što «pryjšoŭ čas».
Lidar BPP abviarhaje abvinavačvańni ŭ tym, što źjaŭlajecca kandydatam Rasii na hetych vybarach.
— Ja nikoli nie byŭ piataj kałonaj… Z 1995 hoda mianie pastajanna sprabavali zrabić staŭlenikam Maskvy. Pastajanna sprabavali znajści nahodu, što ja padtrymlivaju intaresy «starejšaha brata». Ja zaŭsiody vystupaŭ za sajuz słavianskich plamionaŭ, uvachodziŭ u «Słavianski sabor», byŭ sustaršynioj i tamu mieŭ kantakty i z ukrainskim kazactvam, i rasijskim. Ale ja zaŭsiody vystupaŭ ad biełaruskaha kazactva.
Pa słovach Ułachoviča, jamu prapanoŭvali ŭznačalić kanhres ruskich supołak u Biełarusi, ale jon kateharyčna admoviŭsia.
— Navošta nam tut niejkuju supołku ruskuju rabić? My tut ruskija i biełarusy, žyviem u adnoj siamji. U mianie žonka ruskaja, u mianie svaja supołka ŭ domie.
Ułachovič śćviardžaje, što źjaŭlajecca biassprečnym prychilnikam biełaruskaj niezaležnaści, za jakuju, pa jaho słovach, ciapier viadziecca baraćba. Pahroza ž niezaležnaści, ličyć lidar BPP, idzie, u pieršuju čarhu, ad ZŠA i Jeŭrasajuza.
— Kali vy chočacie ŭbačyć nacyjanalista, vy pavinny jaho bačyć u kožnym patryjocie. Heta značyć, i ŭva mnie. Zrazumiejcie pravilna: patryjot — heta dobry nacyjanalist. A ja jašče i kazak, u mianie haspadarski pačatak, ja nie razumieju, što značyć nie być haspadarom na svajoj ziamli. Mnie nie padabajecca heta biazładździe, jakoje časam adbyvajecca ŭ našaj ekanomicy, dzie sprabujuć asobnyja ludzi, jakija nie ŭmiejuć kiravać, skidvać heta ŭsio na ŭładu.
Na hetych słovach da razmovy dałučyŭsia kiraŭnik inicyjatyŭnaj hrupy Ułachoviča Michaił Obrazaŭ i zajaviŭ, što Biełaruś pavinna być niezaležnaj, ale tolki ŭ sajuzie z Rasijaj.
Sam Ułachovič ličyć, što siońniašni ŭzrovień intehracyi ŭ Jeŭrazijskim ekanamičnym sajuzie — dastatkovy. Ale pry hetym jon dadaŭ, što sajuz patrebny «ekanamičny, mytny, palityčny».
Pretendent ličyć, što jaho padtrymajuć kazaki z usiaho śvietu, u tym liku — z Rasii i z abodvuch bakoŭ frontu ŭ Ukrainie. Zrešty, ahavorvajecca kiraŭnik jaho inicyjatyŭnaj hrupy Obrazaŭ, padtrymka budzie nie finansavaj, a maralnaj.
Na pytańnie, čyj Krym, Mikałaj Ułachovič adkazvaje adnaznačna: «Rasijski, i zaŭsiody im byŭ, my ŭsio heta viedajem». «Ukraina za čas svajho kiravańnia razburyła tam sady, aharody, zachapiła prybiarežnyja terytoryi. Ciapier idzie adradžeńnie Krymu», — adznačyŭ pretendent u prezidenty.
Jaho paplečnik Michaił Obrazaŭ dadaŭ:
- Zaraz, kali Ukraina pałaje, patryjoty pavinny pakazać, što jany nie tolki padtrymlivajuć [ŭładu] za kulisami, a jany jość realnaja palityčnaja siła.
Finansavańnie kampanii Ułachoviča, pa słovach jaho i kiraŭnika jaho inicyjatyŭnaj hrupy, budzie vieścisia tolki z vybarčaha fondu i ŭ ramkach zakona. Choć, pryznajecca pretendent, prapanovy ab finansavańni jamu ŭžo pastupali: i ciapier, i raniej.
- Ale nie ad kožnaha my voźmiem. My nie voźmiem u niaŭpeŭnienych ludziej, jakija nie źjaŭlajucca sapraŭdnymi patryjotami, — kaža lidar kazakaŭ.
* * *
18 červienia hetaha hoda Mikałaj Ułachovič staŭ namieśnikam kiraŭnika Minskaha abłasnoha spažyvieckaha sajuza. Da hetaha na praciahu mnohich hadoŭ jon uznačalvaŭ pradpryjemstva «Žyłkamuntechnika» i byŭ namieśnikam Minskaha abłasnoha ŭpraŭleńnia ŽKH.
* * *
Piać faktaŭ pra kazackaha atamana Mikałaja Ułachoviča, jaki zajaviŭsia na prezidenckija vybary
