Biełstat apublikavaŭ statystyčny zbornik «Pramysłovaść», u jakim padsumavanyja vyniki dziejnaści ekanomiki za 2014 hod.
Placoŭka z samazvałami na BiełAZie. Fota Siarhieja Hudzilina.
Asabliva zaŭvažna kryzis adbiŭsia na mašynabudavańni. Abjom vytvorčaści ŭ hetaj halinie letaś skaraciŭsia na 20%. Rentabielnaść prodažaŭ tym časam apuściłasia z 10,1% da 5,9%.
Asobnyja pazicyi. Naprykład, voźmiem «padjomna-transpartaje abstalavańnie». Letaś ich było vyrablena ŭsiaho 5 viežavych kranaŭ. Dla paraŭnańnia, u 2013 zrabili 20 štuk, a ŭ 2010 — 152. A voś vytvorčaść liftaŭ z kožnym hodam nabiraje abaroty.
Sielskahaspadarčyja traktary — adzin z brendaŭ Biełarusi — taksama nie ŭ favory. Apošnija try ich hady vytvorčaść stabilna źmianšajecca: 71 tysiača — 63 tysiačy - 52 tysiačy.
Vypusk amal usich vidaŭ mašyn i abstalavańnia dla sielskaj i lasnoj haspadarki zhortvajecca tymi ž tempami — na 20-25%. Jość i antyrekardsmieny. Vytvorčaść kormaŭboračnych kambajnaŭ abvaliłasia ŭ piać razoŭ, sienaŭboračnych mašyn — u try razy.
Stanki dla apracoŭki mietałaŭ — minus 38%, dla apracoŭki dreva — minus 31%.
Z mašynami dla zdabyčy karysnych vykapniaŭ jašče horš. Vytvorčaść husieničnych traktaraŭ skaraciłasia ŭ 3 razy, buldozieraŭ — u 5 razoŭ, hrejdaraŭ — u 7,5 razu. I navat samazvały (dla biezdarožža i karjernyja), jakija raniej davali šmatmiljonnyja prybytki, vypuskajucca ŭsio radziej. Pazaletaś było vypuščana 6592 mašyn, letaś — 4196.
Hruzavyja aŭtamabili (pieradusim heta pradukcyja MAZa) stali vypuskać na 50% mienš.
Padobnaja situacyja z technikaj dla nasielnictva. Vyklučeńnie tolki adno — vytvorčaść mikrachvalovak pavialičyłasia na 15%. A voś astatniaje… Pralnych mašyn vyrabili ŭdvaja mienš, miasarubak — u 2,5 razu, televizaraŭ — amal u try razy. I navat chaładzilnikaŭ stała na 18% mienš.
Narešcie, paraŭnajem ciapierašniuju situacyju z vypuskam elektraprasaŭ z toj, što była dziesiać hadoŭ tamu. Tady vyrablałasia 179 tysiač, letaś — 3 tysiačy.
