U Baranavičach uziaty pad vartu vadziciel, jaki ŭčyniŭ u niećviarozym stanie śmiarotny najezd na dziaŭčynu, jakaja znachodziłasia ŭ pałatcy, paviedamlaje ŭpraŭleńnie Śledčaha kamiteta pa Bresckaj vobłaści.
Ustanoŭlena, što 25 lipienia, prykładna ŭ 5 hadzin, aŭtamabil Volvo S40, ruchajučysia napierad pa terytoryi rekultyvavanaha karjera blizu vioski Amnievičy Baranavickaha rajona, učyniŭ najezd na turystyčnuju pałatku. U joj u toj momant znachodziłasia 21-hadovaja dziaŭčyna, žycharka Hancavičaŭ, jakaja ad atrymanych cialesnych paškodžańniaŭ pamierła na miescy.
Praviedzieny ahlad vadziciela vyjaviŭ, što jon znachodziŭsia ŭ stanie ałkaholnaha apjanieńnia. 26-hadovy mužčyna — žychar Baranavičaŭ, vadziciel-ekśpiedytar pryvatnaha handlovaha pradpryjemstva.
Baranavicki mižrajonny adździeł SK u dačynieńni da vadziciela raspačaŭ kryminalnuju spravu na padstavie č. 4 art. 317 KK (parušeńnie praviłaŭ darožnaha ruchu asobaj, jakaja kiravała transpartnym srodkam u stanie ałkaholnaha apjanieńnia, što mieła vynikam pa nieaściarožnaści śmierć čałavieka).
Praviedzienyja dopyty śviedak, pryznačany kompleks ekśpiertnych daśledavańniaŭ.
Uličvajučy stupień hramadskaj niebiaśpieki złačynstva i abciažarvajučuju akaličnaść — stan ałkaholnaha apjanieńnia, śledčyja prymianili ŭ dačynieńni da padazronaha mieru strymańnia ŭ vyhladzie ŭziaćcia pad vartu. Taksama fihurantu kryminalnaj spravy vystaŭlena abvinavačvańnie.
