Nacyjanalny fond u padtrymku demakratyi, viadomy pad amierykanskaj abrevijaturaj NED, staŭ pieršaj «niepažadanaj arhanizacyjaj» u Rasii. Adpaviednaje rašeńnie padpisaŭ namieśnik hienprakurora Uładzimir Malinoŭski.
Pryniataje rašeńnie zasnavana na analizie dziejnaści fondu, havorycca ŭ zajavie, raźmieščanaj na sajcie Hienprakuratury. «Vykarystoŭvajučy mahčymaści padkantrolnych rasijskich kamiercyjnych i niekamiercyjnych arhanizacyj, Nacyjanalny fond u padtrymku demakratyi udzielničaŭ u pracy pa pryznańni nielehitymnymi vynikaŭ vybarnych kampanij, arhanizacyi palityčnych akcyj z metaj upłyvu na rašeńni orhanaŭ ułady, dyskredytacyi słužby va Uzbrojenych siłach Rasiei», — paličyła Hienprakuratura.
Na dumku viedamstva, na hetyja mety ŭ 2013—2014 fond pradastaviŭ rasiejskim kamiercyjnym i niekamiercyjnym strukturam finansavuju dapamohu na sumu kala $ 5,2 młn. «Uličvajučy ahulnuju nakiravanaść dziejnaści fondu, prakuraturaj zroblena vysnova ab tym, što jana ŭjaŭlaje pahrozu asnovam kanstytucyjnaha ładu Rasijskaj Fiederacyi, abaranazdolnaści i biaśpieki dziaržavy», — adznačajecca ŭ zajavie. Dla arhanizacyi heta ciahnie admovu ŭ praviadzieńni apieracyj z hrašovymi srodkami i zabaronu na stvareńnie na terytoryi Rasii strukturnych padraździaleńniaŭ arhanizacyi. Miniust u bližejšy čas uniasie arhanizacyi ŭ rejestr niepažadanych arhanizacyj.
Nacyjanalny fond u padtrymku demakratyi ŭvachodzić u «patryjatyčny stop-list» z 12 zamiežnych niaŭradavych arhanizacyj, zaćvierdžany 8 lipienia Savietam Fiederacyi. U śpis taksama ŭvajšli Instytut «Adkrytaje hramadstva» (Fond Sorasa), Mižnarodny respublikanski instytut, Nacyjanalny demakratyčny instytut pa mižnarodnych pytańniach, Fond MakArturaŭ, Freedom House, Fond Čarlza Ściuarta Motta, Fond adukacyi dla demakratyi, Uschodniejeŭrapiejski demakratyčny centr, Suśvietny kanhres ukraincaŭ, Ukrainskaja suśvietnaja kaardynacyjnaja rada, Krymskaja palavaja misija pa pravach čałavieka. U zajavie sienataraŭ havaryłasia, što hetyja NVA viadomyja svajoj «antyrasiejskaj anhažavanaściu».
Sienatary zapatrabavali, kab Hienprakuratura i MZS pravieryli arhanizacyi sa śpisu na adpaviednaść z zakonam ab niepažadanych ŭ Rasii NDA. Paśla hetaha Fond MakArturaŭ pryniaŭ rašeńnie syści z Rasii.
Zakon ab «niepažadanych arhanizacyjach» byŭ pryniaty viasnoj hetaha hoda i staŭ častkaj kampanii pa zastrašvańni rasijskaj apazicyi. Pucinskija ŭłady imknucca nie dapuścić u Rasii narodnaj revalucyi, jakaja adbyłasia va Ukrainie.
