29 lipienia prykładna ŭ 14.00 na vulicy Sialanskaj u Homieli, kala budynka Centralnaha RAUS, milicyja zatrymała žurnalistaŭ-fryłansieraŭ Kanstancina Žukoŭskaha i Natallu Kryvašej.
Jak paviedamiŭ Žukoŭski, jany z kaleham zdymali na videa tabličku na budynku Centralnaha RAUS, i ŭ hety momant ich zatrymali. «Nas chapali za ruki, łajalisia matam, pahražali, ciapier dastavili ŭ adździeł i składajuć pratakoł, pakul nieviadoma, pa jakim artykule. Nas zatrymali niezakonna absalutna. Ja heta źviazvaju z nadychodziačymi vybarami i źviazanym z hetym pieraśledam žurnalistaŭ», — zajaviŭ jon.
Jak stała viadoma, u Centralnym RAUS znachodziacca taksama dvoje žycharoŭ Homiela, zatrymanych za sprobu praviadzieńnia pikieta, — urač Jaŭhien Hodar i jaho žonka Aza Hodar. Jany ŭžo niekalki hadoŭ viaduć sudovyja ciažby ŭ suviazi z prablemami žyllovaha kaapieratyvu, u jakim jany budavali kvateru. 29 lipienia jany sprabavali pravieści pikiet, kab źviarnuć uvahu na prablemy, u pryvatnaści karupcyjnyja.
«My z žonkaj vyjšli z płakatam, dzie było napisana: «Jakija vybary, kali raśćviła karupcyja?» — i Kanstytucyjaj u rukach. Ale nie paśpieli razharnuć płakat, jak nas zatrymała milicyja i dastaviła ŭ Centralny RAUS. Ciapier na nas składajuć pratakoł», — paviedamiŭ Jaŭhien Hodar.
Žurnalisty Kanstancin Žukoŭski i Natalla Kryvašej zdymali na videa sprobu praviadzieńnia pikieta siamiejnaj paraj Hodar.
