Mahčymaść biaźvizavaha naviedvańnia Biełarusi na praciahu troch dzion, jakaja zaraz abmiarkoŭvajecca ŭ krainie, dapamoža vykarystać patencyjał tranzitnych turystaŭ, zajaviŭ na pres-kanfierencyi 30 lipienia ŭ Minsku dyrektar Nacyjanalnaha ahienctva pa turyźmie Ryhor Pamiarancaŭ.
«My tranzitnaja kraina, i nad nami pralataje vialikaja kolkaść turystaŭ ź Jeŭropy ŭ Rasiju, krainy Paŭdniova-Uschodniaj Azii.
Kali my prapanujem turystyčny pradukt, kambinavany tur: naviedvajučy Rasiju ci inšyja krainy, rabić pierasadku ŭ nacyjanalnym aeraporcie Minsk z mahčymaściu vychadu z aeraporta, to takim čynam možna pryciahnuć turystaŭ, jakija, mahčyma, nikoli nie dumali naviedvać Biełaruś», — ličyć Pamiarancaŭ.
Akramia taho, admiena viz dla tranzitnych turystaŭ «moža spravakavać łancuhovuju reakcyju», i takija turysty stanuć «našymi ahientami ŭpłyvu» i buduć raskazvać pra Biełaruś svaim znajomym.
Takaja mahčymaść spryjała b raźvićciu nacyjanalnaj avijakampanii i stała b jaje «kozyram», dadaŭ Pamiarancaŭ.
«Heta dadatkovyja abjomy dla aeraporta, dla horada, dla krainy. Usie, chto pracuje ŭ hetaj śfiery, mohuć atrymać dadatkovuju valutu», — skazaŭ jon.
Pry hetym dyrektar ahienctva padkreśliŭ, što rašeńnie ab admienie viz pavinna być pryniataje «na vyšejšym uzroŭni ŭrada», bo zakranaje pracu siłavych viedamstvaŭ, Ministerstva zamiežnych spraŭ i konsulskich ustanoŭ. «Tut jość pytańni i mihracyjnaha kantrolu, nielehalnaj mihracyi, terarystyčnych pahroz. Usio heta treba ŭzvažvać i znachodzić pravilnaje rašeńnie», — rastłumačyŭ Pamiarancaŭ.
Pierad turystyčnaj halinoj, dadaŭ jon, staić zadača «pakazać pierśpiektyvy hetaha rašeńnia, raskazać, čaho damohsia Piekin ci Šanchaj, kali kiraŭnictva Kitaja pryniało anałahičnaje rašeńnie».
«Ja sam skarystaŭsia takoj pasłuhaj. Kali lacieŭ na kanfierencyju ŭ Łas-Viehas z Novasibirska, u mianie byli varyjanty lacieć cieraz Zachodniaje paŭšarje ci praz Uschodniaje, i stykoŭka była ŭ Piekinie, pryčym nie vielmi dobraja — treba było prylacieć ranicaj i vylecieć pozna nočču, heta značyć siadzieć uvieś dzień u aeraporcie, — skazaŭ Pamiarancaŭ. — Mahčymaściaŭ była masa — možna cieraź Jeŭropu lacieć, cieraź Japoniju, cieraz Banhkok, ale ja vybraŭ pieralot cieraź Piekin, tamu što ja moh zabić dvuch zajcaŭ adnym strełam: ja prylacieŭ, vyjšaŭ u horad, vydatna pravioŭ dzień u Piekinie, pahulaŭ, kupiŭ niejkija suvieniry, viarnuŭsia ŭ aeraport, sieŭ u samalot, zasnuŭ i pračnuŭsia ŭ punkcie pryznačeńnia».
Pavodle słoŭ śpiecyjalista, Sankt-Pieciarburh atrymaŭ bolš za paŭmiljona novych turystaŭ u hod tolki za košt taho, što ŭłady dazvolili pravodzić u horadzie troje sutak bieź vizy pasažyram kruiznych łajnieraŭ, jakija da hetaha naohuł nie zachodzili ŭ Sankt-Pieciarburh.
Bolš za toje, u Rasii abmiarkoŭvajecca pašyreńnie hetaj inicyjatyvy. Pieršaje čytańnie ŭ Dziarždumie prajšoŭ zakonaprajekt, jaki vyznačaje 12 aeraportaŭ (u Maskvie, Sankt-Pieciarburhu, Sočy i inšych haradach), kudy mohuć prylatać turysty i pravodzić u Rasii bieź vizy 72 hadziny.
