U Baranavičach, na aŭtobusnym prypynku ŭ mikrarajonie Paŭdniovy, 30 lipienia była zaŭvažanaja abjava: «Kuplu žyvoha ščupaka! Terminova!».
Fota Taćciany Niekraševič, intex-press.by
«Kamuści dadomu žoncy pakazać!», «Moža, čałaviek u svoj stavok z presnaj vadoj vyrašyŭ zubastuju zapuścić…», «Myšanku zaryblać sabralisia, napeŭna», — paśla publikacyi fatahrafii abjavy takija kamientary źjavilisia ŭ Internecie, karystalniki sieciva stali prapanoŭvać svaje viersii.
Karespandent «Intex-press» patelefanavaŭ pa abjavie i pasprabavaŭ vyśvietlić, navošta čałavieku patrebny žyvy ščupak. Trubku zdymaje žančyna. Jana paćviardžaje, što ryba pavinna być žyvaja i jaje pamiery pavinny ŭkładvacca ŭ 30-50 santymietraŭ.
— Mienavita patrebny žyvy ščupak! Žyvy i nijaki inšy! Taki, kab uvajšoŭ u słoik!.. — niečakana adkazvaje žančyna, hołas jakoj hučyć uschvalavana i napružana.
Dalej dyjałoh składvaŭsia nastupnym čynam:
Karespandent: — Navošta ŭ słoik?
Spadarynia: — Jon nam patrebny na leki, my ź jaho budziem rabić leki.
Karespandent: — Što za lačeńnie?
Žančyna (biantežycca): — Nie mahu skazać…
Karespandent: — Heta viadźmarstva?
Žančyna: — Nie, što vy! — siekundu maŭčyć, niby choča skazać praŭdu, i znoŭ praciahvaje: — Nie, nie mahu skazać, chaču, ale nie mahu, treba maŭčać! Moža potym kali skažu. Zaraz čałavieka vyratavać treba! Pytańnie, možna skazać, žyćcia i śmierci!
Karespandent: -Jak terminova vam patrebny žyvy ščupak?
Spadarynia: — Jak dastaniecie, tak i ŭsio — adrazu ciahnicie!
Canu žančyna nie pryznačyła: maŭlaŭ, «za kolki zachočacie, za stolki i kuplu», padziakavała i pakłała trubku.
Internet prapanuje niekalki viersij lačeńnia ščupakom. Akazvajecca, u narodzie rajać lačyć ščupakom žaŭtuchu i kurynuju ślepatu. Asablivaj papularnaściu karystajecca ščupak pry lačeńni ałkaholnaj zaležnaści. Dla padrychtoŭki nastoju patrebna mienavita žyvy ščupak, nastojeny na harełcy. Nastoj rajać vytrymać u prachałodnym i ciomnym miescy 7 sutak. Abiacajecca, što hajučy napoj dapamoža pazbavić čałavieka ad pjanstva.
Taksama ŭ narodzie chodzić pavierje, što zuby ščupaka nosiać pry sabie, kab uletku nie pakusali źmiei. Niavieście pad sukienku padviešvali zuby ščupaka — ad psuty.