Ź internetu ŭ mejnstrymnyja ŚMI patrapili videazapisy, na jakich vidać i čuvać, jak vysokapastaŭlenyja pradstaŭniki arhanizacyi Planned Parenthood, viadučaha prapahandysta i vykanaŭcy abortaŭ u ZŠA, sa śmiecham raspaviadajuć pra nielehalny handal orhanami zabitych u abartaryjach dziaciej.
Razmovy adbyvajucca za abiedam u restaranie za bakałam vina.
Videa zapisali aktyvisty z supraćabortnaj arhanizacyi Center for Medical Progress, jakija vydavali siabie za pradstaŭnikoŭ firmy, jakaja choča nabyć tyja ci inšyja orhany dla vopytaŭ.
Na adnym ź videa Debora Nukatoła, dyrektar pa medyčnych pasłuhach Planned Parenthood Federation of America, častki mižnarodnaj arhanizacyi International Planned Parenthood Federation, raspaviadaje, što aborty śpiecyjalna pravodziacca takim čynam, kab zabrać orhany nienarodžanych dziaciej i mieć mahčymaść potym pradavać ich.
«Mnohija ciapier šukajuć sercy, kab jany byli cełymi, učora ŭpieršyniu prasili lohkija, taksama šmat patrabujecca piečani», — kaža Nukatoła, bieručy videlcam sałatu.
Nukatoła taksama raspaviadaje, kolki hrošaj Planned Parenthood choča za dziciačyja orhany.
Planned Parenthood hadami maŭčała pra hety bok svajho «biźniesu», zajaŭlajučy, što źjaŭlajecca niekamiercyjnaj arhanizacyjaj.
Mery Hater, prezident adnaho z padraździaleńniaŭ Planned Parenthood Federation of America, u inšym videa handlujecca z aktyvistami Center for Medical Progress.
«Jakuju canu vy čakajecie za niepaškodžany orhan? Jakuju kampiensacyju?» — pytajecca ŭ Hater aktyvist.
«Čamu b vam nie skazać, kolki vy zvyčajna płacicie?.. Na pieramovach, chto pieršy nazyvaje canu, toj hublaje hrošy», — adkazvaje Hater.
Handal čałaviečymi orhanami ŭ ZŠA zabaronieny.
Videa vyklikali buru emocyj i kamientaroŭ u suśvietnym siecivie, jakaja chutka pierakinułasia ŭ asnoŭnyja ŚMI. U krainie adbyłosia bolš za 60 manifiestacyj i pikietaŭ, na jakich tysiačy ludziej zaklikali spynić dziaržaŭnuju padtrymku praabortnaha hihanta.
Usiaho aktyvisty apublikavali try zapisy, jak u skaročanym, hetak i ŭ poŭnym vyhladzie, i abiacali apublikavać jašče jak minimum dzieviać. Pieršyja dva ŭ sumie majuć 3,7 młn prahladaŭ na YouTube.
Planned Parenthood sprabuje praz sud spynić raspaŭsiud videazapisaŭ i źviarnułasia ź listom da ŚMI, kab jany nie pisali na hetuju temu i nie davali spasyłak na zapisy.
Praabortnaja arhanizacyja zajaŭlaje, što nie atrymlivaje prybytku ad handlu orhanami niemaŭlat, tolki biare kampiensacyju za svaju pracu. Svaich apanientaŭ jana nazyvaje niebiaśpiečnymi ekstremistami.
Pradstaŭniki Respublikanskaj partyi ŭ Sienacie ZŠA ŭžo zaklikali pravieści śledstva adnosna Planned Parenthood i pazbavić jaje dziaržaŭnaha finansavańnia.
Prezidenckaja administracyja Baraka Abamy zachoŭvaje maŭčańnie, ale zajaviła, što nie źbirajecca zhadžacca z patrabavańniem respublikancaŭ.
