Novyja praviły pieravozak pasažyraŭ, bahažu i hruzabahažu čyhunačnym transpartam ahulnaha karystańnia ŭvodziacca ŭ Biełarusi z 1 žniŭnia. Heta praduhledžana pastanovaj Savieta Ministraŭ numar 609 ad 17 lipienia 2015 hoda, jakaja siońnia aficyjna apublikavana na Nacyjanalnym pravavym internet-partale.
Jak rastłumačyli ŭ pres-centry Biełaruskaj čyhunki, dakumientam uniesieny šerah źmianieńniaŭ i dapaŭnieńniaŭ u praviły pieravozak, jakija dziejničali raniej, akramia taho častka norm udaskanalena z ulikam praktyki ich prymianieńnia.
«U tym liku dakumientam vyznačany paradak afarmleńnia, pieraafarmleńnia i prajezdu pa prajaznych dakumientach (kvitkach), — udakładnili ŭ BČ. — Tak, vyznačana, što pry pieraafarmleńni prajaznoha dakumienta na ciahnik, jaki adychodzić raniej, u vypadku źmianšeńnia koštu prajezdu, pasažyru viartajecca roźnica ŭ košcie. Da hetaha času jana ŭ takich vypadkach nie viartałasia».
Jašče adnym novaŭviadzieńniem stanie toje, što z 1 žniŭnia afarmleńnie abaniemientnych kvitkoŭ «pracoŭnaha dnia» budzie ažyćciaŭlacca biez paznačeńnia proźvišča, imia i imia pa baćku. Heta značyć, što prajazny dakumient budzie afarmlacca biez pradjaŭleńnia dakumienta, jaki śviedčyć asobu. Akramia taho, viartańnie hrašovych srodkaŭ za niavykarystanyja abaniemientnyja kvitki budzie ažyćciaŭlacca pa zajavie pasažyra, biez pradjaŭleńnia dakumientaŭ, što paćviardžajuć pryčynu viartańnia.
Akramia pieraličanych, u novych praviłach pieravozak pasažyraŭ, bahažu i hruzabahažu źmieščany i šerah inšych źmianieńniaŭ i dapaŭnieńniaŭ.
