Adzin z najbujniejšych u Jeŭropie krytych siamiejna-zabaŭlalnych centraŭ adkryjecca ŭ Minsku na vulicy Prytyckaha: naviedvalnikaŭ čakajuć ruchomyja i razmaŭlajučyja dynazaŭry, śpiavajučyja robaty i simulatary zienitnaj ustanoŭki. Pra heta paviedamili va Uschodnie-jeŭrapiejskaj kampanii, jakaja vałodaje sietkaj abjektaŭ adpačynku i zabaŭ.
Skrynšot ź videa nn.by
Centr siamiejnaha adpačynku «Dynazaŭryja» adkryjecca ŭ kastryčniku. Jon stanie pieršym u Biełarusi krytym parkam zvyšvialikaha farmatu. Siarod admietnych asablivaściej — tematyčnaje afarmleńnie i raznastajnaja šou-prahrama. Raźličany centr jak na dziaciej ad paŭhoda, tak i na darosłych. Ustanova zojmie płošču kala 3 tys. kv.m na dvuch pavierchach kompleksu «Civali».
Park budzie padzieleny na dźvie asnoŭnyja zony: uvieś čaćviorty pavierch — śviet džunhlaŭ i suchaputnych dynazaŭraŭ, a na jarus nižej budzie stvoranaja atmaśfiera padvodnaha carstva. Interjer padtrymaje tematyku: dekaracyi ŭ pamiaškańniach zymitujuć i tropiki, i marskoje dno z karałavymi ryfami.
U parku ŭstanoviać bolš za 60 atrakcyjonaŭ i hulniavych aparataŭ. Siarod ich — 12 dynazaŭraŭ, u tym liku tyranazaŭr Reks. U čas 15-minutnaha šou pačvary buduć śpiavać, ruchacca i raskazvać ab sabie. Na vybar prapanujuć dźvie zabaŭlalnyja prahramy i adnu adukacyjnuju — dla dziciačych sadoŭ i škoł.
Naviedvalnikaŭ taksama čakaje vystupleńnie arkiestra «viasiołych» robataŭ i «vyviaržeńnie vułkana» — nievialikaja insceniroŭka sa śpiecefiektami. Dzieciam da 8 hadoŭ buduć dastupny čatyrochpaviarchovy łabirynt, pakoj ź miakkimi cackami i mini-karusieli, piasočnicy z kiniematyčnym piaskom, jaki nie lipnie da ruk i daje mahčymaść budavać zamki i składanyja fihury.
Darosłyja zmohuć prymierać «ekzaškilet» — atrakcyjon z poŭnaj svabodaj ruchu, jaki viercicca na 360 hradusaŭ va ŭsich płoskaściach. Akramia taho, buduć ustanoŭleny dva vidy simulatara zienitna-kulamiotnaj ustanoŭki, jakija navučać stralać pa tankach i samalotach. Buduć taksama łaziernyja bai, mini-boŭlinh i tancavalnyja płatformy. Mnohija niuansy kamplektacyi centra pakul nie raskryvajucca, kab zrabić naviedvalnikam siurpryz.
U siamiejnym centry arhanizujuć restarannuju zonu na 200 miesc, bar i kafieteryj ź dziciačym mieniu. Pravieści čas u asiarodździ siamji možna budzie ŭ čatyroch VIP-pakojach, stylizavanych pad piačory.
Uvachod u park zabaŭ biaspłatny. Płacić treba budzie tolki za atrakcyjony pa śpiecyjalnaj kartcy, na jakuju naviedvalnik moža pakłaści lubuju sumu hrošaj. Kab skarystacca atrakcyjonam, dastatkova prykłaści «płastyk» da kartrydaraŭ. Darečy, takaja sistema paśpiachova pracuje ŭžo ŭ niekatorych minskich zabaŭlalnych centrach.
«Dynazaŭryja» budzie supracoŭničać ź dziciačymi ŭstanovami. Dla dziaciej padrychtujuć sieryju adukacyjnych majstar-kłasaŭ, buduć pracavać pastajannyja hurtki, u tym liku cyrkavoha mastactva. Piedahohi zmohuć pravodzić interaktyŭnyja ŭroki bijałohii i zaałohii, vykarystoŭvajučy hihanckich paŭzunoŭ.
«Ustanova budzie vyznačacca jak vializnymi pamierami, tak i bahatym napaŭnieńniem — anałahičnyja zabaŭlalnyja parki ciapier možna znajści tolki ŭ vialikich jeŭrapiejskich stalicach, nakštałt Paryža, Maskvy, Prahi abo Bierlina», — adznačyŭ namieśnik dyrektara ZAT «Uschodnie-jeŭrapiejskaja kampanija» Dźmitryj Filimonaŭ.
Hladzicie taksama: Jak vyhladajuć dynazaŭry ŭ minskim DynaParku? VIDEA
