Čynoŭniki i nabližanyja da ŭłady asoby redka pradajuć nadzieły ŭ elitnych staličnych rajonach, takich jak Drazdy, Viaśninka, Ržaviec. Hetuju ziamlu jany atrymali na zvyšvyhadnych umovach ci ŭ padarunak i trymajucca za statusnaje miesca.
Abjava ź Vilejskaj
Na sajtach ahienctvaŭ nieruchomaści źjaviłasia abjava ab prodažy niedabudavanaha katedža na vulicy Vilejskaj. Heta rajon za «Minsk-Arenaj», tut žyvie bankaŭskaja elita: Piatro Prakapovič, pieršy vice-premjer Vasil Maciušeŭski, staršynia Nacbanka Pavieł Kałaŭr.
Pobač — alimpijskija čempijony. Niepadaloku dabudoŭvajecca dom, kudy, kažuć, maje zasialicca biehły kirhizski lidar Kurmanbiek Bakijeŭ. Karaciej, kampanija padabrałasia vielmi prystojnaja.
Pobač staić toj samy vystaŭleny na prodaž katedž 68-hadovaha sudździ Fajzuły Abdułojeviča Abdułojeva.
Jak hramadzianin Tadžykistana zajmieŭ elitnuju nieruchomaść?
Mižnarodnaje supracoŭnictva
Biełaruś — siabar mnohich miždziaržaŭnych utvareńniaŭ na postsavieckaj prastory. SND, ADKB, Mytny sajuz, JeŭrAzES… Kožnaja z hetych arhanizacyj maje svaje biurakratyčnyja struktury, niekatoryja ź ich raźmiaščajucca ŭ Biełarusi.
Štab-kvateru Ekanamičnaha suda SND vyrašyli zrabić u Minsku. Adpaviedna krainy-ŭdzielnicy prysyłajuć svaich pradstaŭnikoŭ u našu krainu. Biełaruś abaviazanaja dać im słužbovaje žyllo. Dla hetych metaŭ vydzielenyja kvatery «Dypservisa» ŭ šmatpaviarchovikach na vulicy Čyrvonaarmiejskaj.
U 2004 hodzie Tadžykistan źmianiŭ svajho pradstaŭnika pry Ekanamičnym sudzie. Im staŭ pieršy namieśnik ministra justycyi Tadžykistana Fajzuła Abdułojeŭ.
Cikava, što jahony papiarednik, Chajdarchudža Talibaŭ, vyrašyŭ zastacca ŭ Biełarusi. Jon uładkavaŭsia advakatam u adnu ź jurydyčnych kansultacyj Minska.
Ź ciaham času Abdułojeva abrali staršynioj Ekanamičnaha suda SND. Čym zajmałasia arhanizacyja pad jaho kiraŭnictvam? Pa słovach samoha sudździ, pieradusim tłumačyła pałažeńni zakanadaŭčych aktaŭ SND. Pa zvarotach dziaržaŭ było razhledžana tolki dzieviać sprečak.
Intehracyja na postsavieckaj prastory praciahvaje raźvivacca, i ŭ śniežni 2011 hoda źjaviłasia novaje ŭtvareńnie — Ekanamičny sud JeŭrAzES. Abdułojeva pieraviali tudy pracavać adnym z vaśmi sudździaŭ. I mienavita ŭ hetyja dni biełaruskija ŭłady vyrašyli zrabić jamu dziŭny padarunak.
Niavyhadnaja damova
Fajzuła Abdułojeŭ i Minharvykankam zaklučyli arendnuju damovu na ŭčastak na vulicy Vilejskaj. Pavodle dakumienta, hramadzianin Tadžykistana braŭ na 98 hadoŭ nadzieł pamieram 12,75 sotki.
Kadastravaja cana hetaj ziamli składaje $205 tysiač. I heta tolki aficyjnaja cana, rynkavy košt našmat bolšy.
A voś Abdułojeŭ, pavodle dakumienta, płacić usiaho 344 250 rubloŭ na hod. Zaklučanaja damova zvyšniavyhadnaja dla biudžetu. Na momant padpisańnia dakumienta heta było kala $40, u ekvivalencie, pa ciapierašnim kursie — kala $22. Z kožnaj nastupnaj devalvacyjaj suma mienšaje.
Adnak u lubym vypadku pretendavać na ŭčastak sudździa nie moh. Pa ahulnym pravile, vyznačanym prezidenckim ukazam «Ab kanfiskacyi i pieradačy ziamielnych učastkaŭ», ziamla pad budaŭnictva vydzialajecca pa vynikach aŭkcyjonaŭ. U Minsku vyklučeńnie zroblena tolki dla šmatdzietnych siemjaŭ, jakim ziamla moža vydavacca biez tarhoŭ.
Što praŭda, Fajzuła Abdułojeŭ — nasamreč šmatdzietny baćka. Pavodle aficyjnaj bijahrafii, u jaho 8 dziaciej i 25 unukaŭ. Ale ž jon hramadzianin Tadžykistana, a nie Biełarusi! I niejkim čynam abskakaŭ usio čarhu achvotnych budavacca biełarusaŭ.
Tak dom musiŭ vyhladać pavodle prajekta
Niepatrebny katedž
Atrymaŭšy ziamlu, sudździa pavolna pačaŭ budaŭnictva. Pavolna — bo za dva z pałovaj hoda hatoŭnaść doma składaje ŭsiaho 27%. Vykładzieny tolki pieršy pavierch, dyj toj nie nakryty. Fajzuła Abdułojeŭ straciŭ intares da budoŭli i vyrašyŭ pradać jaje.
Budoŭla daŭno zakansiervavanaja
Na sajtach ahienctvaŭ nieruchomaści za niedarobleny katedž prosiać $265 tysiač. Cana nižejšaja za prapanovy susiednich damoŭ, bo ziamla zastajecca va ŭłasnaści dziaržavy. Ryełtar, jakaja viadzie prodaž, pryznajecca, što pryvatyzavać učastak budzie nadzvyčaj składana. Tamu novy haspadar zastaniecca z damovaj arendy.
Cana hatovaha zbudavańnia na «svajoj» ziamli ŭ hetym rajonie dachodziła b da $1 miljona.
Adnak dla Fajzuły Abdułojeva historyja ŭ lubym vypadku vyhadnaja. Na jaho radzimie siaredni zarobak «čystymi» składaje $123 — heta najhoršy pakazčyk na postsavieckaj prastory. Siaredni tadžyk na toj dom, jaki pradaje sudździa JeŭrAzES, pavinien zarablać 180 hadoŭ.
***
Fajzuła Abdułojeŭ
Naradziŭsia ŭ kišłaku Kanhurt Chatłonskaj vobłaści Tadžykistana. Skončyŭ jurydyčny fakultet Tadžykskaha dziaržaŭnaha ŭniviersiteta. Pracavaŭ u sudovaj śfiery (1976—1990), byŭ ministram justycyi (1990—1993), staršynioj Vyšejšaha ekanamičnaha suda (1995—1996) i Kanstytucyjnaha suda (1996—2000). Sudździa Ekanamičnaha suda SND (2004—2011), jaho staršynia (2008—2011). Sudździa Ekanamičnaha suda JeŭrAzES (z 2011).
