Prezident ZŠA Barak Abama vystupiŭ z prapanovami pa baraćbie sa źmienaj klimatu. Jon pradstaviŭ płan «Čystaja enierhija», što musić značna skaracić vykidy parnikovych hazaŭ. Poŭnaje videa vystupu Abamy pradstaŭlenaje na Youtube-kanale Biełaha domu.
Pavodle płanu Abamy, ciaham nastupnych 15 hod prapanujecca na 32% skaracić vykidy parnikovych hazaŭ amierykanskimi elektrastancyjami, pryniać značnyja miery pa raźvićci alternatyŭnaj enierhietyki.
«Kali my nie zrobim hetaha, to nichto nie zrobić», — kaža Abama pra baraćbu sa źmienaj klimatu.
Kožny štat atrymaje kvoty na parnikovyja vykidy i budzie davać spravazdaču pa ich vykanańni Fiederalnamu ahienctvu pa abaronie navakolnaha asiarodździa. Takija kroki buduć suadnosnyja z efiektam, jaki dało by źniknieńnie z daroh 166 młn aŭtamabilaŭ.
Abama nazyvaje płan «samym vialikim krokam» u baraćbie sa źmienaj klimatu, a ŭłasna źmienu klimatu — «najbolšaj pahrozaj śvietu». Prezident ZŠA śćviardžaje, što my — «pieršaje pakaleńnie, što adčuła efiekt klimatyčnych źmien, i apošniaje, što jašče moža niešta z hetym zrabić».
Śćviardžajecca, što pry ŭmovie vykanańnia płanu ŭ 2030 hodzie Štaty paźbiehnuć 3600 śmiarciej niepaŭnaletnich i 90 tysiač vypadkaŭ astmy ŭ dziaciej, 300 tysiač prapuščanych praz chvaroby hadzin vučoby i pracy. Płan maje zekanomić spažyŭcam 155 młrd dalaraŭ za 2020-2030 hod (albo kala 85 dalaraŭ na hod u rachunku za elektryčnaść na siamju ŭ 2030 hodzie). Kali ŭsio pojdzie pavodle płanu, u 2030 hodzie budzie vyrablacca na 30% bolš enierhii z adnaŭlalnych krynic, buduć stvoranyja tysiačy rabočych miescaŭ, ceny na elektryčnaść z «čystych» krynic praciahnuć spadać.
Ci budzie pry novym prezidencie (vybary ŭ ZŠA projduć 8 listapada 2016 hoda, Abama nie moža brać u ich udzieł) vykonvacca płan Abamy i nakolki efiektyŭnym jon akažacca, nieviadoma.
Chiłary Klintan, adzin z mahčymych kandydataŭ ad Demakratyčnaj partyi, uchvaliła płan prezidenta-supartyjca i paabiacała navat bolšyja kroki pa baraćbie sa źmienaj klimatu ŭ vypadku jaje abrańnia, piša USA Today.
Respublikancy krytykujuć płan praź jaho pabočnyja efiekty. U pryvatnaści, mahčymy kandydat-respublikaniec Džeb Buš turbujecca ab skaračeńni rabočych miescaŭ i roście cen na enierhiju. Ale, adznačaje Bloomberg, svajho płanu pa baraćbie sa źmienaj klimatu respublikancy nie majuć.
Tearetyčna, enierhijaj z adnaŭlalnych krynic možna zabiaśpiečyć mnostva ludziej — navat nievialikuju krainu. Na praktycy heta dakazała Kosta-Ryka.
Na pačatku 2015 hoda na alternatyŭnuju enierhietyku na peŭny čas pierajšła cełaja kraina — Kosta-Ryka. Za pieršaje paŭhodździe 98,55% vyrablenaj tam enierhii zdabyvałasia z adnaŭlalnych krynic. Ci mahčymy taki pierachod na alternatyŭnuju enierhietyku ŭ ZŠA ŭ bližejšyja dziesiacihodździ, nieviadoma.
Ab poŭnaj admovie ad tradycyjnych krynic enierhii ŭ bližejšaj budučyni nichto z amierykanskich palitykaŭ nie kaža. Abama admioŭ zajavu pra toje, što płan jość «vajnoj vuhlu» i nazvaŭ takija vykazvańni zapałochvańniem, adznačaje BBC. A štatam, zaležnym ad zdabyčy vuhlu, paabiacaŭ reinviestavańnie. Raniej paviedamlałasia, što ŭpor u płanie rabiŭsia nie na adnaŭlalnyja krynicy enierhii, a na pierachod ad vuhalnych da hazavych elektrastancyj, u finalnaj viersii płanu hetaj idei nie nadajecca ŭvahi.
