Staršynia Partyi BNF Alaksiej Janukievič zaklikaje aktyvistku kampanii «Havary praŭdu» Taćcianu Karatkievič i staršyniu Abjadnanaj hramadzianskaj partyi Anatola Labiedźku nie zdymacca z prezidenckich vybaraŭ.
«Vykarystajcie kožny dzień zboru podpisaŭ, a kali ŭdasca sabrać bolš za 100 tysiač — damahajciesia rehistracyi i pracujcie kožny dzień ahitacyi. Kab pieramieny ŭ krainie nadyšli najchutčej. Kab najchutčej Biełaruś stałasia sapraŭdy svabodnaj i niezaležnaj», — napisaŭ jon u adkrytym liście da Karatkievič i Labiedźki.
Janukievič zaznačyŭ, što ŭžo doŭhi čas hučać zakliki da patencyjalnych kandydataŭ zdymacca z vybaraŭ i dałučacca da prychilnikaŭ bajkotu. Pry hetym jon miarkuje, što «zakliki da bajkotu abjadnoŭvaje adsutnaść łahičnych arhumientaŭ, uhruntavanych na ćviarozym rozumie dy zdarovym sensie».
Palityk skazaŭ, što ŭ vykazvańniach tych, chto zaklikaje da bajkotu, u vočy «kidajecca kałasalnaja ŭnutranaja supiarečnaść». Tak, zaznačyŭ jon, prychilniki bajkotu, z adnaho boku, nazyvajuć vybary farsam, kamiedyjaj, šou», ź inšaha — sprabujuć «zapeŭnić nas z vami, što bajkot vybaraŭ niasie surjoznuju pahrozu režymu i, naadvarot, udzieł apazicyi ŭ vybarach paciahnie za saboj niepapraŭnyja katastrofy».
Pamyłku ŭ takich vykazvańniach Janukievič źviazvaje ź nierazumieńniem kryteryjaŭ, u adpaviednaści ź jakimi Zachad aceńvaje vybary. «Sapraŭdnymi kryteryjami dla Zachadu źjaŭlajecca vykanańnie vybarčych pracedur. <…> Vidavočna, što mienavita ŭdzieł u vybarach, a nie bajkot, stvaraje dla ŭładaŭ bolš prablem pakazać isnuju sistemu vybaraŭ jak sumlennuju i demakratyčnuju», — zaznačyŭ jon.
Druhuju pamyłku Janukievič źviazvaje z «nierazumieńniem abo śviadomym ihnaravańniem taho fakta, što isnuje roźnica pamiž pryznańniem vybaraŭ i pryznańniem ułady». «Zachad nie pryznavaŭ prezidenckija vybary, ale pryznavaŭ i pryznaje Alaksandra Łukašenku kiraŭnikom dziaržavy», — padkreśliŭ jon.
Janukievič taksama zaznačyŭ, što niaredka zakliki da bajkotu sprabujuć paćvierdzić tezisam ab amaralnaści ŭdziełu ŭ vybarach pry najaŭnaści palitviaźniaŭ. Adnak, skazaŭ jon, u 2010 hodzie taksama byli palitviaźni, a sioleta palitviazień Mikałaj Statkievič daŭ svaju zhodu na ŭdzieł u vybarčaj kampanii. «Niama i nikoli nie było nijakich realnych faktaŭ, jakija mahli b śviedčyć pra toje, što najaŭnaść abo adsutnaść demakratyčnych kandydataŭ na vybarach chacia b minimalna moža ŭpłyvać na los palitviaźniaŭ», — padkreśliŭ palityk.
Janukievič nazvaŭ piać asnoŭnych plusoŭ udziełu ŭ vybarach: mabilizacyja prychilnikaŭ, bieł-čyrvona-biełyja ściahi na vulicach, demanstracyja alternatyvy, vypraboŭvańnie rečaisnaści, mabilizacyja demakratyčnych aktyvistaŭ.
«Niechta zaŭsiody skaža: «Chiba mahčymaści padčas vybaraŭ takija ŭnikalnyja? Chiba niemahčyma rabić tyja ž rečy biez vybaraŭ?» Niešta sapraŭdy možna rabić i biez vybaraŭ, i my heta robim. Ale šmat što mahčyma rabić sapraŭdy tolki padčas vybaraŭ. I heta sapraŭdy ŭnikalnyja tydni, zmarnavać kožny ź jakich było b vialikaj pamyłkaj», — zajaviŭ Janukievič.
