Žurnalisty niezaležnych ŚMI, jakija ŭziali 4 žniŭnia intervju ŭ Alaksandra Łukašenki, zadavolenyja sustrečaj z prezidentam i adznačajuć, što jon adkazaŭ na ŭsie pastaŭlenyja pytańni.
«Ja zadavoleny, na pytańni, jakija ja zadaŭ Łukašenku, jon adkazaŭ. I adkazvaŭ u pryjemnym tonie: i pra vykarystańnie biełaruskaj movy, i pra Kurapaty, i pra palityčnych źniavolenych. Urešcie ja vypytaŭ, što Mikałaja Statkieviča mohuć vyzvalić. Pa-žurnaliscku heta było cikava», — adznačyŭ u kamientaryi BiełaPAN žurnalist «Radyjo Svaboda» Valeryj Kalinoŭski.
Pavodle jaho słoŭ, nijakich abmiežavańniaŭ padčas intervju pierad žurnalistami nie staviłasia, akramia taho, što daviałosia zdać mabilnyja telefony, adnak dazvolena było karystacca dyktafonami i płanšetami.
Akramia Kalinoŭskaha ŭ zale na sustrečy z kiraŭnikom dziaržavy prysutničali hałoŭny redaktar partała tut.by Maryna Zołatava, karespandent «Jeŭraradyjo» Źmicier Łukašuk i pres-sakratar Łukašenki Natalla Ejsmant. Karespandenta dziaržaŭnaha ahienctva BiełTA, jakoje taksama pieradavała paviedamleńni ź miesca padziej, u zale nie było.
Žurnalist «Jeŭraradyjo» Źmicier Łukašuk źviarnuŭ uvahu na toje, što adzinym techničnym abmiežavańniem dla zaprošanych žurnalistaŭ była zabarona na fota- i videazdymku — hetyja materyjały pa vynikach intervju abaviazałasia dać pres-słužba prezidenta.
«Ja zadavoleny najpierš tym, što vykanana abiacańnie kiraŭnika dziaržavy, jakoje jon daŭ padčas studzieńskaj pres-kanfierencyi «Jeŭraradyjo» i «Radyjo Svaboda», — pravieści z nami intervju. Łukašenka adkazvaŭ na ŭsie pytańni, jakija jamu zadavali, ad nas nichto nie patrabavaŭ uzhadnieńnia pytańniaŭ», — adznačyŭ Łukašuk.
Pavodle słoŭ karespandenta «Jeŭraradyjo», jon zadaŭ Łukašenku «prykładna dziesiać pytańniaŭ roznaj skiravanaści». «Ja cikaviŭsia, ci pamiataje kiraŭnik dziaržavy svaje pieradvybarnyja abiacańni, jakija jon davaŭ u 2006 i ŭ 2010 hadach, spytaŭ pra toje, ci palacić Łukašenka na samit AAN u vieraśni», — skazaŭ Łukašuk.
Hałoŭny redaktar partała tut.by Maryna Zołatava ŭ kamientaryi BiełaPAN adznačyła: «Ja zadavała pytańni ab dalejšym ekanamičnym raźvićci krainy, jakim prezident jaho bačyć, i nie mahu skazać, kab ja atrymała vyraznyja adkazy».
Intervju prezidenta niedziaržaŭnym ŚMI adbyłosia 4 žniŭnia. Jano praciahvałasia pryblizna čatyry z pałovaj hadziny. Na sustreču ŭ Pałac niezaležnaści byli zaprošanyja pradstaŭniki «Radyjo Svaboda», «Jeŭraradyjo» i partała tut.by.
