Śledčyja raźbirajucca, chto vinavaty ŭ najeździe na milicyjaniera pasiarod minskaj kalcavoj. DAI tłumačyć, ci parušaŭ instrukcyi ich supracoŭnik.
Fota onliner.by
Rezanansnaje DTZ zdaryłasia na 37-m kiłamietry minskaj kalcavoj u paniadziełak 3-ha žniŭnia. Kiroŭca «Opiela Viektra» ździajśniaŭ pierastrajeńnie z treciaj pałasy ŭ druhuju i ŭ hety momant źbiŭ supracoŭnika DAI. Pavodle viersii staličnaj Dziaržaŭtainśpiekcyi, vinavaty kiroŭca «Opiela», bo nie pryniaŭ mier dla źnižeńnia chutkaści ŭ toj momant, kali inšyja aŭtamabilisty heta zrabili. A supracoŭnik DAI vyskačyŭ na darohu, bo spyniaŭ pravaparušalnika.
Pryčym dahetul nieviadoma, kaho mienavita sprabavaŭ spynić milicyjanier, jaki karystaŭsia radaram davoli staroha ŭzoru biez fota- i videafiksacyi. Siońnia patłumačyć, što zdaryłasia, paciarpieły supracoŭnik nie moža. Jon vyžyŭ, ale atrymaŭ ciažkija traŭmy, u tym liku pierałom čerapa.
«Napeŭna, jon vybiahaŭ na darohu, kab spynić «lotčyka». Bieh chutka, kažuć, što źjaviŭsia z-za traktara», — adzin z aŭtamabilistaŭ pieradaje Jeŭraradyjo infarmacyju, jakuju pa racyi pačuŭ ad dalnabojščykaŭ.
Adnak niepasrednyja śviedki zdareńnia z žurnalistami pakul nie razmaŭlali. Lubaja infarmacyja pakul vyhladaje zdahadkaj.
Na forumach u bajnecie aŭtamabilisty dzielacca ŭłasnym dośviedam taho, jak biantežylisia padčas niečakanaha źjaŭleńnia supracoŭnika DAI na darozie. Tamu źviartajemsia u Dziaržaŭtainśpiekcyju Minharvykankama z pytańniem, ci moža inśpiektar, pavodle instrukcyj, vybiahać z žazłom pasiarod chutkasnaj mahistrali?
«Supracoŭnik DAI, kali spyniaje pravaparušalnika, nie parušaje instrukcyi. Naadvarot jon abaviazany prypynić pravaparušeńnie. Zvyčajna ŭ takich situacyjach spačatku spyniajucca mašyny, jakija ruchajucca ŭ bližnich da inśpiektara pałosach. Paśla mahčyma spynić parušalnika, jaki mčycca, naprykład, pa levaj krajniaj pałasie», — tłumačyć inśpiektar ahitacyi i prapahandy DAI Minska Arciom Cybulka.
U Dziaržaŭtainśpiekcyi pakul nie viedajuć usich detalaŭ zdareńnia, adnak kanstatujuć, što zvyčajna kiroŭca, jaki nie parušaje praviły, nie davodzić spravu da DTZ. Trahiedyi ž zdarajucca, kali aŭtaamatar albo hublaje ŭvahu, albo pieravyšaje chutkaść.
«U praviłach darožnaha ruchu skazana, što kiroŭca pavinien ruchacca z toj chutkaściu, jakaja dazvoliła b jamu spynić transpartny srodak u vypadku ŭźniknieńnia pieraškody na jaho šlachu. Kali vy nie budziecie adciahvać uvahu, naprykład, na radyjo i budziecie ruchacca z chutkaściu 90 km/h, to ŭ kožnym razie zaŭvažycie supracoŭnika DAI. Tym bolš, kali heta adbyvajecca na roŭnaj darozie MKAD u soniečny letni dzień. Kali ž kiroŭca ruchajecca ź pieravyšeńniem chutkaści, to fizičnaj mahčymaści spynicca moža i nie być. Vyšejšaja chutkaść — bolšy tarmazny šlach», — adznačaje Arciom Cybulka.
Jeŭraradyjo: Na minskaj kalcavoj — bieźlič kamier fotafiksacyi. Čamu tam stajać z radarami jašče i supracoŭniki DAI?
Arciom Cybulka: «Dzie na MKAD stajać kamiery — heta nie sakret. Jany paznačanyja na sajcie «Centra fiksacyi pravaparušeńniaŭ». Isnujuć i mabilnyja dadatki, jakija apaviaščajuć kiroŭcaŭ ab nabližeńni da kamieraŭ. Niekatoryja vadzicieli, prajazdžajučy ich, znoŭku pieravyšajuć chutkaść. Tamu na ŭčastkach, dzie niama kamier, pracujuć inśpiektary i kantralujuć chutkaść. Parušeńnie chutkasnaha režymu — na druhim miescy siarod pryčynaŭ DTZ. Na pieršym — parušeńnie praviłaŭ prajezdu piešachodnych pierachodaŭ».
