Tut i nižej fota: Maxim, 2004
Rasijski časopis Maxim z nahody viasiella pres-sakratara Pucina Dźmitryja Piaskova i fihurystki Taćciany Naŭki apublikavaŭ 7 žniŭnia archiŭny eratyčny fataset apošniaj. Ale ŭžo 11 žniŭnia publikacyja była vydalenaja. Dy, jak zaŭvažajuć žurnalisty, zastałasia ŭ kešy Google.
Razam z fotasetam dziesiacihadovaj daŭniny časopis «padniaŭ» i intervju Naŭki. Dy chutka vydaliŭ pa jaje prośbie.
Jana raspaviadaje, što nie viedała pra značeńnie svajho proźvišča (navka — rusałka pa-ŭkrainsku), raspaviadała pra sport, žyćcio ŭ ZŠA, svajho tahačasnaha muža Alaksandra Žulina, pieršaje kachańnie i luboŭ da seksu i da, i paśla spabornictvaŭ.
U kamientary TJournal kiraŭnictva Maxim paćvierdziła, što materyjał byŭ vydaleny pa prośbie jaho hieraini.
Varta adznačyć, što vydaleńnie materyjału vyklikała tak zvany efiekt Strejzand: fota stali tolki aktyŭniej raźlatacca pa internecie.
Efiekt atrymaŭ takuju nazvu praz toje, što ŭ 2003 hodzie akciorka Barbara Strejzand praz sud patrabavała vydalić zdymki jaje doma na ŭźbiarežžy Kalifornii i spahnać z fatohrafa i sajta 50 młn dalaraŭ. Da padačy ŭ sud fota prahladzieli 6 raz (ź ich dva — advakaty Strejzand), praź miesiac tolki z adnoha sajta ŭžo 420 tysiač raz.
***
Taćciana Naŭka naradziłasia ŭ 1975 hodzie ŭ Dnieprapiatroŭsku. U 1988 hodzie pierajechała ŭ Maskvu. U 1991 hodzie trapiła ŭ zbornuju SSSR pa fihurnym katańni. Z 1991 da 1998 hoda vystupała za Biełaruś, za toj čas pradstaŭlała Biełaruś u pary z armianinam Samvełam Hiezalanam na alimpijadach u Lilichamiery (1994) i Nahana (1998), zavajavała piataje miesca na čempijanacie śvietu (1994) i čaćviortaje — na čempijanacie Jeŭropy (1995), dvojčy (1996-97 i 1997-98) pieramahała na čempijanacie Biełarusi.
Taćciana Naŭka i Samveł Hiezalan vystupajuć za Biełaruś na čempijanacie Jeŭropy-1995
Z 1998 hoda vystupaje za Rasiju. U 2003 hodzie stała čempijonam Rasii ŭ pary z rasiejcam Ramanam Kastamaravym, u tym ža hodzie para ŭziała bronzu na čempijanacie Jeŭropy. Z 2004 hoda para brała tolki zołata na čempijanatach Rasii, Jeŭropy i śvietu, uziała zołata na alimpijadzie ŭ Turynie (2006). Paśla 2006 hoda Naŭka i Kastamaraŭ zavieršyli spartyŭnyja karjery. Zdymałasia ŭ rasijskich telešoŭ «Zorki na lodzie», «Ledavikovy pieryjad» i inšych.
U 2000 hodzie vyjšła zamuž za svajho treniera Alaksandra Žulina, raźviałasia ź im u 2010-m. Ad jaho maje dačku Alaksandru.
Dźmitryj Piaskoŭ, jaho hadzińnik i Taćciana Naŭka. Fota: Aleh Mitvol, 2015
U 2010-m hodzie paznajomiłasia ź Dźmitryjam Piaskovym, u 2014-m naradziła ad jaho dačku Nadzieju, vyjšła za jaho zamuž u 2015-m. Na viasielli na ruce Piaskova zaŭvažyli hadzińnik canoj ad 150 da 600 tysiač dalaraŭ, Piaskoŭ patłumačyŭ, što heta byŭ padarunak Naŭki. Samo viasielle kaštavała minimum 600 tysiač dalaraŭ.
Sam Piaskoŭ žanaty ŭžo ŭ treci raz, ad papiarednich šlubaŭ maje troch synoŭ i dačku.
