12 žniŭnia były kandydat u prezidenty, palitviazień Mikałaj Statkievič, śviatkuje svajo 59-hodździe. Kali heta možna nazvać śviatkavańniem.

U honar hetaha dnia prajšli adrazu niekalki akcyj.Jašče zahadzia pravaabaroncy i aktyvisty zapuścili chešteh #Sky4Statkievich (Nieba dla Statkieviča).

«Čarhovy Dzień naradžeńnia ŭ turmie, u adzinočnaj kamery. Jon nie bačyć ni nieba, ni chmar, ni sonca, ni dreŭ, nie čuje śpievaŭ ptušak. U suviazi z hetym, šerah niedziaržaŭnych arhanizacyjaŭ razam sa svajakami palitviaźniaŭ pravodziać akcyju salidarnaści ź Mikałajem Statkievičam - # Sky4Statkievich. Jakim čynam pryniać udzieł? Zrabicie fota nieba, chmarki, soniejka, dreva i apublikujcie jaho ŭ sacyjalnych sietkach — Facebook, Twitter, Instagram, pastaviŭšy śpiecyjalny chešteh # Sky4Statkievich i spasyłku na pietycyju z patrabavańniem vyzvaleńnia Mikałaja Statkieviča: change.org/FreeStatkevich

Padpišycie pietycyju, stvoranuju Marynaj Adamovič, žonkaj palitviaźnia, i patrabujcie jaho vyzvaleńnia: change.org/FreeStatkevich. Apublikujcie infarmacyju ab hetaj akcyi na svajoj staroncy ŭ sacyjalnych sietkach. Nie zabyvajcie: salidarnaść macniej represij!», — havaryłasia ŭ paviedamleńni.

A niepasredna 12 žniŭnia ŭ Prazie, u aeraporcie imia Vacłava Havieła, aktyvisty pryjšli ŭ zał čakańnia z płakatami «Svabodu palityčnym źniavolenym Biełarusi» i partretami Statkieviča.

Pavinšavać Mikołu moža luby čałaviek. Dla hetaha treba dasłać telehramu pa adrasie: 212011, h. Mahiloŭ, vuł. Krupskaj, 99A, turma № 4, Statkieviču Mikałaju Viktaraviču.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?