Stvorana hramadskaja hrupa pa praviercy podpisaŭ, sabranych u padtrymku vyłučeńnia Taćciany Karatkievič kandydatam u prezidenty.
Skład hrupy zaćvierdžany 26 žniŭnia na pasiadžeńni z udziełam pieršaha namieśnika staršyni ruchu «Za Svabodu» Juryja Hubareviča, staršyni Partyi BNF Alaksieja Janukieviča, sustaršyni arhkamiteta pa stvareńni partyi «Biełaruskaja chryścijanskaja demakratyja» (BCHD) Paŭła Sieviarynca i pradstaŭnika kampanii «Naš dom» Valeryja Ščukina.
Jak paviedamiŭ BiełaPAN Hubarevič, u skład hramadskaj hrupy pa praviercy podpisaŭ uklučana 15 členaŭ hetych arhanizacyj, a kaardynataram hrupy abrany pradstaŭnik ruchu «Za Svabodu» Juryj Mielaškievič.
«Usie hetyja struktury majuć dastatkova surjozny vopyt zboru podpisaŭ. Pry hetym «Za Svabodu», BCHD i «Naš dom» na vybarach hetaha hoda nie vyłučali i nie padtrymlivali nikoha z pretendentaŭ na pasadu prezidenta, zajmajuć niejtralnaje stanovišča da ŭsich ź ich», — adznačyŭ Hubarevič.
Na pasiadžeńni taksama zaćvierdžana mietodyka pravierki podpisaŭ, dakładnaje vykanańnie jakoj, pavodle jaho słoŭ, «moža dać adkaz na pytańnie, sapraŭdnyja podpisy ci nie».
«Kab nie zastałosia nijakich sumnieńniaŭ, što mohuć praskočyć falsifikavanyja podpisy, hrupa najpierš pavinna mieć dostup da poŭnaj bazy kopij podpisaŭ, kab pieraličyć ich i vizualna pierakanacca, što adsutničajuć prykmiety ich padroblivańnia. Taksama hrupa pravierki pavinna mieć mahčymaść adsartavać bazu pa nasielenych punktach, pravieryć ich na najaŭnaść paŭtoraŭ podpisaŭ ad adnoj i toj ža asoby. Akramia taho, hrupa pavinna ažyćciavić vybaračnuju prazvonku asob, jakija ŭpisanyja ŭ padpisnyja listy», — skazaŭ Hubarevič.
U dalejšych płanach hrupy pa praviercy podpisaŭ, paviedamiŭ palityk, — «naładžvańnie rabočych adnosin sa štabam Karatkievič, udakładnieńnie techničnych detalej pravierki, paśla čaho hrupa mahła b pačać pravierku».
Hubarevič taksama paviedamiŭ, što napiaredadni, 25 žniŭnia, kiraŭnik štaba Karatkievič Andrej Dźmitryjeŭ byŭ papiaredžany ab pasiadžeńni hrupy. «My zaprasili jaho asabista abo paprasili prysłać svajho pradstaŭnika. Adnak ni jon sam, ni jaho pradstaŭnik na pasiadžeńni nie byli. Choć u cełym ja liču, što takaja praca pavinna pravodzicca ŭ ciesnaj kaardynacyi z kiraŭnikom štaba abo jaho pradstaŭnikom», — dadaŭ palityk.
Z prapanovaj pravieści niezaležnuju ekśpiertyzu dakładnaści podpisaŭ za vyłučeńnie kandydataŭ u prezidenty jašče 14 lipienia vystupiŭ ruch «Za Svabodu».
24 žniŭnia «Za Svabodu» adrasavaŭ hetu prapanovu piersanalna Karatkievič, jakaja na siońnia zastajecca «apošnim demakratyčnym pradstaŭnikom» u vybarčaj kampanii i ŭ vypadku rehistracyi kandydatam u prezidenty stanie «hołasam usich demakratyčnych sił». Uličvajučy, što «ŭ publičnaj prastory čutny nastojlivyja hałasy niedavieru adnosna realnaj kolkaści podpisaŭ, sabranych inicyjatyŭnaj hrupaj Karatkievič», ruch «Za Svabodu» ličyć, što ich niezaležnaja hramadskaja pravierka stała b «hodnym krokam maralnaj palityki i sposabam palapšeńnia imidžu demakratyčnych sił».
Siońnia ŭ kamientaryi BiełaPAN Karatkievič zajaviła, što nie suprać dać sabranyja ŭ padtrymku jaje vyłučeńnia podpisy, ale ličyć, što ciapier jaje kamandzie lepš skancentravacca na vybarčaj kampanii.
