Aktyvistka Svabodnaha prafsajuza Biełaruskaha (SPB) Aksana Kiernažyckaja zvolnienaja z Babrujskaha zavoda traktarnych detalaŭ i ahrehataŭ (BZTDiA).
Staršynia SPB Michaił Kavalkoŭ źviazvaje zvalnieńnie Kiernažyckaj ź jaje aktyŭnaj baraćboj za pravy pracoŭnych. «Pryčyna zvalnieńnia ŭ tym, što jana člen Svabodnaha prafsajuza, udzielničała ŭ roznych akcyjach u abaronu pravoŭ pracoŭnych zavoda», — zajaviŭ Kavalkoŭ, adznačyŭšy, što Kiernažyckaja nie pracuje na zavodzie z 22 žniŭnia.
«Mnie nichto nie skazaŭ, što mianie zvalniajuć za členstva ŭ Svabodnym prafsajuzie, ale ŭsio zvodziłasia da taho. Za miesiac mianie prainfarmavali. Usio heta ambicyi dyrektara zavoda i jaho namieśnika Jelisiejenki. Za dva hady da hetaha mnie skazali, što my na tvajo miesca piaciarych voźmiem, ale ty pracavać tut nie budzieš», — paviedamiła Aksana Kiernažyckaja, jakaja 19 hadoŭ prapracavała na BZTDiA śvidravalščykam, vychavała starejšuju dačku i maje na ŭtrymańni 12-hadovaha syna.
«My staralisia, kab nie było hetaha zvalnieńnia. Ja źviartaŭsia ŭ suviazi z hetym u Babrujski harvykankam. U kancy lipienia mnie patelefanavaŭ namieśnik staršyni harvykankama Alaksandr Markačoŭ, jaki zapeŭniŭ, što losam Aksany zajmajecca sam staršynia harvykankama Andrej Kavalenka, i ŭsio budzie dobra, i jana budzie pracavać», — skazaŭ Kavalkoŭ. Pavodle jaho słoŭ, akramia zvarotu ŭ Babrujski harvykankam z metaj niedapuščeńnia zvalnieńnia Kiernažyckaj SPB źviartaŭsia i ŭ inšyja orhany ŭłady, u pryvatnaści ŭ Mahiloŭski abłvykankam.
«U majoj jurysdykcyi hetych pytańniaŭ niama. Ja nie źjaŭlajusia najmalnikam u asobie Babrujskaha zavoda traktarnych detalaŭ i ahrehataŭ. Heta dahavornyja adnosiny pamiž najmalnikam i pracoŭnym. Što ja mahu rastłumačyć u hetym pytańni? Ja pytańniami pracaŭładkavańnia na peŭnym pradpryjemstvie nie zajmajusia, ničym nie mahu dapamahčy», — zajaviŭ Alaksandr Markačoŭ.
Kavalkoŭ adznačyŭ, što z BZTDiA za apošni čas zvolnienyja dvoje pracoŭnych — členaŭ SPB, jakija majuć na ŭtrymańni niepaŭnaletnich dziaciej, siemji jakich zastalisia biez srodkaŭ da isnavańnia. Heta akramia Kiernažyckaj jašče ślesar-instrumientalščyk V razradu Siarhiej Pičuhoŭ, jaki 11 hadoŭ adpracavaŭ na pradpryjemstvie. «Jość jašče adzin kandydat na zvalnieńnie — apieratar kacielni Anatol Patapovič. Jamu piać hadoŭ zastajecca da piensii, jon invalid treciaj hrupy, a jaho zvalniajuć», — raskazaŭ prafsajuzny lidar.
25 lipienia XI źjezd SPB pryniaŭ zajavu adnosna dyskryminacyi pa prafsajuznaj prykmiecie na BZTDiA. U joj havaryłasia, što dyrektar zavoda, deputat Mahiloŭskaha abłasnoha savieta deputataŭ Alaksandr Ahranovič «va ŭron vytvorčaści vykidaje na vulicu vysokakvalifikavanych rabotnikaŭ, łomiačy pry hetym čałaviečyja losy». «Biaźmiežža i samaŭpraŭnaść ułady nie pakinuli inšaha vybaru ŭ abaronie pravoŭ i intaresaŭ, honaru i hodnaści našych tavaryšaŭ i členaŭ ich siemjaŭ, čym advažycca na radykalnyja miery pratestu. I my ich razam z kalehami pa niezaležnym prafsajuznym ruchu krainy, mižnarodnym prafsajuznym ruchu vymušanyja budziem ažyćciaŭlać, čaho b heta ni kaštavała», — zajavili delehaty źjezda.
Adznačym, što kiraŭnictva BZTDiA doŭhi čas admaŭlajecca ad kamientaryjaŭ adnosna abvinavačańniaŭ u dyskryminacyi pavodle prafsajuznaj prykmiety.
