Biełaruskaja kampanija ActiveCloud, što zajmajecca virtualnym chostynham i vobłačnymi rašeńniami, praviała test biełaruskich bankaŭ u internecie, pa vynikach jakoha tolki 5 z 27 bankaŭ atrymali maksimalnuju adznaku A za biaśpieku, 30% atrymali najnižejšuju adznaku F.
Najvyšejšyja acenki słužbaŭ internet-bankinhu atrymali «BSB Bank» i «MTBank», sajt «Technabanka» atrymaŭ maksimalnuju adznaku ŭ paraŭnańni z usimi sajtami biełaruskich bankaŭ i słužbami internet-bankinhu.
Pravieryć svaju słužbu internet-bankinhu možna tut. Pravierka zajmaje niekalki chvilin.
Letam 2015 hoda adzin z pratakołaŭ SSL, što baronić złučeńnie miž bankam i klijentam, byŭ pryznany niebiaśpiečnym. Ale pryznańnie niebiaśpiečnym nie značyć, što im, jak i inšymi niebiaśpiečnymi technałohijami, pierastanuć karystacca.
Tyja słužby internet-bankinhu, što atrymali ŭ teście adznaku F, majuć u biaśpiecy «dziru» (POODLE), što dazvalaje biez asablivych prablem kraści infarmacyju, što pieradajecca miž klijentam i bankam. Častka ź ich uraźlivaja da asablivaha typu atak (Diffie-Hellman), pry jakich złamyśniki mohuć čytać, kapijavać i źmianiać źviestki, što karystalnik pieradaje banku (naprykład, pašpartnyja źviestki, adrasy, numary telefonaŭ pry zajaŭcy na kredyt).
Absalutnaja bolšaść bankaŭ maje taki ałharytm (ałharytm chešavańnia SHA-1), jakomu sučasnyja braŭziery nadajuć status «niebiaśpiečnaha» ci «biaśpiečnaha, ale z pamyłkami», i papiaredžvajuć pra heta karystalnika. Banki na heta pakul nie źviartajuć uvahi, chacia zamianić ałharytm na novy (SHA-256) bolšaść pastaŭščykoŭ siertyfikataŭ biaśpieki moža biaspłatna. Niekatoryja banki naohuł nie šyfrujuć infarmacyju, što karystalnik pieradaje pry tym ža zapaŭnieńni zajaŭki na kredyt.
Źviarnicie ŭvahu na zamočak, namalavany ŭ adrasnym radku — mahčyma, vaš braŭzier sam papiaredžvaje, što bank niebiaśpiečny. Skrynšot sajta «Technabanka», acenka biaśpieki stanoŭčaja
Kali vaša słužba internet-bankinhu atrymała u teście nizkuju adznaku, varta pierastać joj karystacca da taho, jak bank nie «załataje dziry». Daviedacca pra biaśpieku złučeńnia možna i prosta ŭ braŭziery: bolšaść ź ich u adrasnym radku maluje zamočki roznych koleraŭ, pa naciskańni na jakija možna daviedacca pra biaśpieku złučeńnia. Naprykład, sajtam, jakim Chrome maluje zialony zamočak (i padpisvaje pobač ź im nazvu ŭstanovy), u pryncypie možna daviarać.
