Palicyja Turcyi zatrymała čaćviarych siryjcaŭ, jakija padazrajucca ŭ datyčnaści da arhanizacyi pieravozki dla biežancaŭ ź Siryi, čyja łodka pierakuliłasia. Zahinuli jak minimum 12 čałaviek, siarod jakich trochhadovy Ajłan Kurdzi, jaho piacihadovy brat i ich maci, pieradaje RTÉ News sa spasyłkaj na tureckaje ahienctva Dogan.
Pa dadzienych RTÉ News, čaćviarych padazravanych, siarod jakich kapitan łodki, zatrymali ŭviečary 2 vieraśnia i dapytali na nastupny dzień.
Fatazdymki trochhadovaha Ajłana Kurdzi, čyjo cieła vykinuła na turecki plaž, šakavali suśvietnuju supolnaść. Siamja chłopčyka była ŭ liku biežancaŭ ź siryjskaha horada Kabani — z Turcyi jany sprabavali dabracca na łodcy da hrečaskaj vyspy Kos. Łodka pierakuliłasia, što pryviało da hibieli jak minimum 12 ludziej, siarod jakich maci i piacihadovy brat Ajłana.
Abduła Kurdzi
Baćka chłopčyka, Abduła Kurdzi, vyžyŭ. Jaho znajšli ŭ paŭprytomnym stanie i dastavili ŭ balnicu niedaloka ad tureckaha horada Badrum. Paźniej jon raspavioŭ ahienctvu Dogan, što ŭ momant katastrofy jaho dzieci vyśliznuli ŭ jaho z ruk.
«Ja trymaŭ za ruku maju žonku. Ale maje dzieci vyśliznuli ŭ mianie z ruk. My sprabavali čaplacca za łodku, ale ź jaje vychodziła pavietra. Było ciomna, i ŭsie kryčali», — skazaŭ jon.
Jaho siastra Teema, jakaja žyvie ŭ Vankuviery, raspaviała kanadskaj haziecie National Post, što daviedałasia pra hibiel plamieńnikaŭ i žonki brata ad inšych svajakoŭ. Abduła z žonkaj i dziećmi raniej padavali uładam Kanady zajavu ab pradastaŭleńni statusu biežanca z pryvatnym spansiravańniem, ale jana była adchilena z-za prablem z zajavami z Turcyi.
«Ja sprabavała spansiravać ich, i ŭ mianie jość siabry i susiedzi, jakija dapamahli mnie z bankaŭskimi depazitami, ale my nie mahli vyciahnuć ich, i tamu jany adpravilisia ŭ łodcy», — patłumačyła Teema Kurdzi.
Jana adznačyła, što płaciła za svaich svajakoŭ arendu ŭ Turcyi. Ale, pa jaje słovach, u Turcyi žachliva staviacca da siryjcaŭ.
