U sakaviku ŭ Babrujsku ministr unutranych spraŭ Ihar Šunievič adznačyŭ, što luboje abmiežavańnie z ałkaholem idzie tolki na karyść narmalizacyi kryminahiennaj abstanoŭki. I pachvaliŭsia: štodnia jaho padnačalenyja zatrymlivajuć kantrafaktnaje śpirtnoje, źniščajuć dziasiatki ton brahi dla samahonu.
Adnak pačalisia prablemy z napaŭnieńniem biudžetu, prajšła «narada ŭ kiraŭnika dziaržavy» ŭ kancy žniŭnia — i voś užo admienienaja zabarona na prodaž ałkaholu ŭ kramach unačy.
Vidać, i pavyšeńnia cenzu ŭžyvańnia ałkaholu z 21 hoda nie adbudziecca. Choć za heta katory hod vystupajuć Ministerstva achovy zdaroŭja, MUS, Hienprakuratura.
Hrošy, hrošy važniejšyja.
Darečy, niekalki hadoŭ tamu papulizm zahubiŭ jašče adno dobraje pačynańnie MUS. U Biełarusi ŭ kancy 2003 hoda pryniali papraŭku, zhodna ź jakoj blizkaje śviatło far na aŭto stała abaviazkovym u luby čas sutak z 1 listapada pa 31 sakavika. Ale Łukašenka raskrytykavaŭ daišnikaŭ za ich novaŭviadzieńnie. «Jedzieš i naziraješ: sonca haryć, śviatło — lepš nie prydumaješ, a mašyna jedzie z uklučanymi farami».
Praz dva dni novaŭviadzieńnie admianili.
Na minułym tydni skončyłasia takoje kompleksnaje mierapryjemstva «Uvaha — dzieci!»: tre' było z 25 žniŭnia pa 5 vieraśnia jeździć ź blizkim śviatłom far uvieś čas. Dzieci pajšli ŭ škołu, i być pilnymi treba — śviatło far źviartaje ŭvahu dziaciej, heta dakazana psichołahami. Cudoŭna! Tolki dzieci chodziać u škołu 9 miesiacaŭ, a nie tolki padčas akcyi.
Paŭmiera, jakaja vyjaŭlaje biezdapamožnaść cełaha ministerstva pierad krytykaj adnaho čałavieka. U Jeŭropie jeździć sa śviatłom abaviazkova. Daišniki adčuvajuć svaju racyju, ale voś pierakanać Łukašenku ŭ pravilnaści admienienaj adzinaccać hadoŭ tamu miery nie mohuć albo nie aśmielvajucca.
