Jeŭrasajuz nie pavinien havaryć z aficyjnym Minskam vyklučna na movie sankcyj, zajaviła ŭ sieradu kiraŭnica jeŭrapiejskaj dypłamatyi Fiederyka Mahieryni, vystupajučy na plenarnaj siesii Jeŭraparłamienta ŭ Strasburhu, paviedamlaje RIA «Novosti».
«Ja zhodnaja, što padychod da Biełarusi pavinien być realistyčnym, a nie tolki abmiežavanym našaj palitykaj u halinie sankcyj», — skazała jana.
Sa słovaŭ Mahieryni, adkaz Jeŭrasajuza na niadaŭniaje vyzvaleńnie ŭładami Biełarusi palitviaźniaŭ «pavinien być adekvatnym». «My zhodnyja, što zaraz jość akno mahčymaściaŭ, jakija nie varta vypuścić. Pytańnie ŭ tym, jak zrabić heta najbolš razumnym, pazityŭnym i praduktyŭnym čynam. Ja miarkuju, što, jaki b ni byŭ adkaz ES, jon budzie supravadžacca krokami pa aktyvizacyi supracoŭnictva», — dadała jana.
«My chočam ruchacca ŭ kirunku palapšeńnia adnosinaŭ ź Biełaruśsiu», — skazała kiraŭnica jeŭrapiejskaj dypłamatyi. Pa słovach Mahieryni, ES patrebna doŭhaterminovaja palityka ŭ dačynieńni da Biełarusi.
Razam z tym jana pakazała, što pierazahruzka adnosin Biełarusi i Jeŭrasajuza i prypynieńnie sankcyj u dačynieńni da Minska zaležać ad acenki pryznačanych na 11 kastryčnika ŭ krainie prezidenckich vybaraŭ.
