U žniŭni ŭ redakcyju Intex-press źviarnulisia žychary vulicy Tarfianoj u Baranavičach. Jany ździŭlalisia: čamu kala doma čynoŭnika bardziury jość, a kala ich damoŭ nie?
Na vulicy Tarfianoj — kala 90 damoŭ. Kali prajścisia pa vulicy ad pačatku da kanca, to možna zaŭvažyć, što bardziury ŭstalavanyja nie ŭsiudy. Jašče miesiac tamu jany stajali tolki kala dvuch damoŭ — №22 i 24.
U žniŭni ŭ redakcyju źviarnuŭsia žychar vulicy Pavieł Maskačenkaŭ. Jon raspavioŭ, što padčas daždžu jaho dom i aharod, raźmieščanyja ŭ nizinie, zalivajucca patokami vady z vulicy. Abaranić aharod ad padtapleńnia mahli b bardziury, ale ich u červieni ŭstalavali tolki kala dvuch damoŭ na ŭsioj vulicy. Pavieł aburyŭsia: kali bardziury stajać u inšych, to i ŭ jaho doma ich taksama pavinny ŭstalavać.
Žychary raspaviali, što ŭ domie №22 žyvie načalnik adździeła žyllova-kamunalnaj haspadarki Baranavickaha harvykankama Andrej Siamaška. Pra heta śviedčyć i zapis u Nacyjanalnym kadastravym ahienctvie, zhodna ź jakoj čynoŭnik vałodaje dolaj ŭ hetym domie. Sam čynoŭnik na pytańnie, čamu tolki ŭ jaho doma stajać bardziury, adchryściŭsia ad taho, što maje da hetaha niejkaje dačynieńnie.
Paśla taho jak hazieta pačała raźbiracca ŭ situacyi, bardziury ŭstalavali i kala inšych damoŭ.
