Fota BiełTA
Prablemy hienieałohii rodu Radziviłaŭ XV—XXI stahodździaŭ abmiarkujuć udzielniki mižnarodnaha kruhłaha stała, jaki projdzie 17 vieraśnia ŭ Nacyjanalnym historyka-kulturnym muziei-zapaviedniku «Niaśviž». Pra heta paviedamiŭ namieśnik dyrektara pa navukovaj rabocie ŭstanovy kultury Dźmitryj Jackievič.
U mierapryjemstvie ŭdzielničajuć kala 30 śpiecyjalistaŭ, siarod jakich viadomyja historyki, archivisty, śpiecyjalisty ŭ halinie hienieałohii i hieraldyki, krajaznaŭcy i muziejnyja rabotniki Biełarusi i Polščy.
«U 2015 hodzie adznačajucca dźvie važnyja jubilejnyja daty historyi rodu Radziviłaŭ: 500 hadoŭ z dnia naradžeńnia «niekaranavanaha karala Litvy» Mikałaja Radziviła Čornaha i 175 hadoŭ z dnia naradžeńnia Maryi Daroty de Kastelan Radzivił, francužanki pa pachodžańni, jakaja niamała zrabiła dla adradžeńnia familnaj rezidencyi ŭ Niaśvižy. Mienavita heta i pasłužyła padstavaj dla arhanizacyi mierapryjemstva», — adznačyŭ Dźmitryj Jackievič.
Udzielniki kruhłaha stała vystupiać z dakładami, u jakich zakranuty temy hienieałohii kniazioŭ Radziviłaŭ, ich miesca siarod arystakratyi i manaršych dynastyj Jeŭropy XVI—XX stahodździaŭ, małaviadomych linij rodu, a taksama asablivaściaŭ radziviłaŭskaj hieraldyki. Akramia taho, buduć pradstaŭlenyja archiŭnyja dakumienty i vyniki apošnich daśledavańniaŭ, pryśviečanych Radziviłam.
