U Polščy prajšli mierapryjemstvy ŭ suviazi z 76-j hadavinaj pačatku savieckaj uzbrojenaj ahresii suprać hetaj krainy.
U čaćvier roŭna apoŭdni ŭ varšaŭskim muzei Cytadel ŭ prysutnaści prezydenta Polščy Andžeja Dudy i premjer-ministra Evy Kopač byŭ adkryty muzej Katynskaha złačynstva, jaki budavaŭsia try hady — jaho ekspazycyi niama roŭnych u śviecie. Pra heta paviedamlaje z Varšavy karespandent Radyjo Svaboda Alaksiej Dzikavicki.
«Jość rečy śviatyja dla palakaŭ. Jany vychodziać za miežy zvyčajnaj historyi, i na ich budujecca naša nacyjanalnaja pamiać. Da takich adnosicca Katyń», — zajaviŭ ministar abarony Polščy Tomaš Siamoniak, vystupajučy na adkryćci.
Niekalkimi hadzinami paźniej byli ŭskładzienyja kvietki da pomnika «Zahinułym i zabitym na ŭschodzie» — u pamiać ab 21.000 pałonnych polskich aficeraŭ, rasstralanych u Savieckim Sajuzie 75 hadoŭ tamu. Pa słovach prezydenta Polščy Andžeja Dudy, katynskaje złačynstva, metaj jakoha było źniščeńnie polskaha narodu, pavinna być nazvana hienacydam.
Rasiejski bok admaŭlajecca nazvać katynskaje złačynstva hienacydam.
17 vieraśnia 1939 hodu na padstavie sakretnaha pratakołu da damovy pamiž stalinskim SSSR i hitleraŭskaj Niamieččynaj (paktu Mołatava — Rybentropa) ab padziele Polščy, Čyrvonaja armija naniesła ŭdar u śpinu palakam, jakija zmahalisia z vojskami Vermachtu.
Taksama ŭčora ŭ polskim miastečku Pianienžna pačaŭsia znos pomnika savieckamu hienerału Ivanu Čarniachoŭskamu, jaki niasie adkaznaść za aryšt niekalkich tysiač žaŭnieraŭ Armii Krajovaj u Vilni i, jak ličać u Polščy, za śmierć častki tych ź ich, chto byŭ sasłany zatym u savieckija lahiery.
