Śledčy kamitet vyvučaje akaličnaści incydentu ŭ padziemnym pierachodzie stancyi mietro «Uručča», paviedamili ŭ Śledčym kamitecie.
Hety incydent atrymaŭ vialiki hramadski rezanans. Supracoŭniki milicyi spuścili sa schodaŭ invalida, jaki prasiŭ miłaścinu. Pryčym ciahnuli taho za nahu. Za žabraka zastupilisia ludzi. U internecie źjaviłasia videa hetaha zdareńnia i mnostva kamientaroŭ z rezka niehatyŭnaj acenkaj dziejańniaŭ milicyjantaŭ.
Varta adznačyć, što karespandenty «Našaj Nivy» nazirali, jak ludziej nieachajnaha vyhladu ŭ minułyja dni zatrymlivali i ŭ inšych rajonach horada. Mahčyma, stalicu «začyščajuć» ad «asacyjalnych elemientaŭ» i žabrakoŭ napiaredadni vybaraŭ i pryjezdu na ich mižnarodnych naziralnikaŭ.
Čytajcie taksama:
Apublikavana VIDEA, jak milicyjant u Minsku vałače žabraka pa schodach za nahu, scena vyklikała vybuch hnievu ludziej u mietro
Milicyjanty śćviardžajuć, što ŭviečary 18 vieraśnia da supracoŭnikaŭ UUS pa achovie Minskaha mietrapalitena «pastupili skarhi ad hramadzian na mužčynu nieachajnaha vyhladu», jaki prasiŭ miłaścinu ŭ padziemnym pierachodzie stancyi mietro «Uručča». Milicyjant nibyta prapanavaŭ žabraku prajści ŭ pakoj milicyi dla vyśviatleńnia asoby i raźbiralnictva.
Pavodle infarmacyi Śledčaha kamiteta, mužčyna admoviŭsia padparadkavacca zakonnym patrabavańniam pravaachoŭnika. Dalej, vyjaŭlajučy biespryčynnuju ahresiju, jon pačaŭ niecenzurna łajacca ŭ adras milicyjanta, vykazvaŭ abrazy i pahrozy. Padčas dastaŭleńnia dziažurnym naradam ŭ pakoj milicyi dla raźbiralnictva, hramadzianin akazaŭ aktyŭny supraciŭ: kusaŭ supracoŭnikaŭ milicyi za ruki, udaryŭ adnaho ź ich u tvar, sprabavaŭ nanosić ŭdary nahami i paškodziŭ formiennaje abmundziravańnie. Kab pryciahnuć uvahu ludziej, jon demanstravaŭ iłžyvuju biezdapamožnaść i niemahčymaść samastojna chadzić.
U chodzie pieršapačatkovych śledčych dziejańniaŭ ustanoŭlena, što 41-hadovy uradženiec Minska raniej byŭ nieadnarazova sudzimy, u tym liku za majomasnyja złačynstvy, a taksama złosnaje i asabliva złosnaje chulihanstva. Rehistracyi nie maje, pražyvaje ŭ svajakoŭ, ciaham niekalkich hadoŭ zajmajecca žabractvam, pazicyjanuje siabie invalidam słychu i maŭleńnia.
Pieršamajskim (Minska) rajonnym adździełam Śledčaha kamiteta ŭ dačynieńni da mužčyny biez peŭnaha miesca žycharstva i rodu zaniatkaŭ zaviedzienaja kryminalnaja sprava ab supracivie supracoŭnikam orhanaŭ unutranych spraŭ.
Z padazravanym ciapier pravodziacca śledčyja dziejańni ŭ prysutnaści abaroncy.
Vyznačajecca jaho fizičny stan adnosna abmiežavanaści fizičnych mahčymaściaŭ. U vyniku miedycynskaha ahladu ŭ zatrymanaha nie vyjaŭlena cialesnych paškodžańniaŭ, skarhaŭ na stan zdaroŭja jon nie vykazvaŭ. Pavodle pakazańniaŭ zatrymanaha, jon maje prablemy psichičnaha charaktaru, u suviazi z čym nieadnarazova prachodziŭ lačeńnie ŭ śpiecyjalizavanych ustanovach. Śledstvam praviarajecca hetaja infarmacyja, pryznačana praviadzieńnie sudovaj psichijatryčnaj ekśpiertyzy.
U ramkach rasśledavańnia kryminalnaj spravy ŭstaloŭvajucca pryčyny i ŭmovy, jakija spryjali ŭźniknieńniu dadzienaha kanfliktu.
