Upieršyniu z času raspadu SSSR vajennaje viedamstva ZŠA abnaŭlaje płan dziejańniaŭ u vypadku ŭzbrojenaha kanfliktu z Rasijaj. «Rasijskaje ŭvarvańnie va uschodniuju Ukrainu pieratvaryła ŭ pył ŭsie płany ZŠA pa dziejańniach u niepradbačanych abstavinach», — pryvodzić słovy vajennaha ekśpierta, byłoj namieśnicy ministra abarony ZŠA Mišel Fłurnoj aŭtar artykuła pad nazvaj «Pientahon rychtuje novyja vajennyja płany na vypadak bałtyjskaj bitvy z Rasijaj», apublikavanaha ŭ piatnicu, 18 vieraśnia, na sajcie časopisa Foreign Policy.
Pavodle dadzienych časopisa, jaki spasyłajecca na vysokapastaŭlenyja krynicy ŭ Pientahonie, novyja płany hrupujucca pa dvuch napramkach: dziejańni ZŠA ŭ ramkach NATA ŭ vypadku, kali Rasija atakuje adnaho ź siabroŭ aljansu, i samastojnyja dziejańni «za miežami nataŭskaha parasona». U abodvuch vypadkach «płany fakusirujucca na rasiejskim uvarvańni ŭ krainy Bałtyi» z ulikam «hibrydnaj taktyki Rasii, vykarystanaj u Krymie i na ŭschodzie Ukrainy».
Jak śćviardžajecca ŭ artykule, paśla 1991 hoda ZŠA razhladali Rasiju jak krainu, što pastupova intehrujucca ŭ zachodni śviet, jakaja nie ŭjaŭlaje pahrozy ni dla Jeŭropy, ni dla Amieryki. Navat vajna z Hruzijaj u 2008 hodzie praktyčna nie pamianiała hety padychod, choć NATA pačało ŭ toj čas pierahladać svaje adnosiny z RF. Ale ŭsio źmianiłasia ŭ 2014 hodzie, kali Uładzimir Pucin padnios vajennym analitykam ZŠA «siurpryz», pasłaŭšy «zialonych čałaviečkaŭ» u Krym.
Analityki daśledčaha centra RAND Corporation pryjšli tady da vysnovy, što ŭ vypadku rasiejskaha napadu na krainy Bałtyi, u NATA nie chopić sił ich abaranić. Paśla hetaha vajennyja ekśpierty i śpiecyjalisty Pientahona prystupili da raspracoŭki mahčymaha adkazu pry nieabchodnaści advajoŭvańnia akupavanych terytoryj krain, jakija ŭvachodziać u aljans, rasijskaj kibierataki ci navat prymianieńnia taktyčnaj jadziernaj zbroi, adznačajecca ŭ apublikavanym materyjale.
