Kiraŭnika stvarajemaha hramadskaha ruchu «Za dziaržaŭnaść i niezaležnaść Biełarusi» Uładzimira Niaklajeva paŭtorna vyklikajuć u milicyju ŭ suviazi z administracyjnaj spravaj ab arhanizacyi niesankcyjanavanaha pikieta ŭ Minsku. Pra heta palityk paviedamiŭ BiełaPAN.
Nahadajem, ranicaj 22 vieraśnia Niaklajeŭ źjaviŭsia va UUS Centralnaha rajona Minska pa poźvie, adnak supracoŭnika milicyi, jaki vyklikaŭ jaho, nie było na miescy. «Padyšoŭ niejki padpałkoŭnik, skazaŭ, što supracoŭnika, jaki mianie vyklikaŭ, niama na miescy, i prapanavaŭ pačakać. Ja admoviŭsia», — skazaŭ Niaklajeŭ žurnalistam, jakija čakali jaho kala budynka RUUS.
U dačynieńni da Niaklajeva viadziecca praces ab administracyjnym pravaparušeńni, praduhledžanym č. 1 art. 23.34 KoAP (parušeńnie paradku arhanizacyi abo praviadzieńnia masavaha mierapryjemstva abo pikietavańnia). Havorka idzie pra pikiet «Za sumlennyja svabodnyja vybary!», jaki prajšoŭ 10 vieraśnia kala HUMa. Pry hetym Niaklajeŭ pakul nie padpisaŭ składzieny ŭ dačynieńni da jaho pratakoł.
Palityk paviedamiŭ BiełaPAN, što ŭčora jamu telefanavali z RUUS i prapanoŭvali paŭtorna pryjści va ŭpraŭleńnie, na što jon adkazaŭ, što pryjdzie tolki pa novaj poźvie. «Ja im skazaŭ, što nie viedaju, jak jany vykarystajuć hetu «pryvatnuju hutarku», kali ja pryjdu», — zaznačyŭ Niaklajeŭ.
U svaju čarhu staršynia Abjadnanaj hramadzianskaj partyi Anatol Labiedźka, u dačynieńni da jakoha składzieny pratakoł za praviadzieńnie 16 vieraśnia pikieta ŭ pamiać źnikłaha palityka Viktara Hančara i pradprymalnika Anatola Krasoŭskaha, paviedamiŭ, što pakul u milicyju jaho nie vyklikali. «Nijakich pozvaŭ mnie nie prysyłali», — skazaŭ jon.
