U kastryčniku ŭ Mahiloŭskim abłasnym sudzie pačniecca razhlad rezanansnaj kryminalnaj spravy, adnymi ź fihurantaŭ jakoj ź`iaŭlajucca byłyja čynoŭniki — pieršy namieśnik staršyni Homielskaha abłvykankama i namieśnik staršyni abłvykankama.
Jak paviedamili ŭ Mahiloŭskim abłasnym sudzie, usiaho pa kryminalnaj spravie prachodziać abvinavačvanymi šaściora čałaviek: dva namieśniki staršyni abłvykankama, syn adnaho ź ich — dyrektar pryvatnaha pradpryjemstva, i siamiejnaja para z Rasii — IP i jaje muž, dyrektar TAA. Jašče adzin abvinavačvany — były dyrektar chołdynhu «Homielskaja miasa-małočnaja kampanija». Letam 2015 hoda jon byŭ asudžany ŭ Homieli za karupcyjnaje złačynstva, nie źviazanaje z hetaj kryminalnaj spravaj.
Sprava ab`iomnaja — 90 tamoŭ, dźvie ź jakich utrymlivajuć abvinavačvańnie.
Nahadajem, dva namieśniki staršyni Homielskaha abłvykankama byli zatrymanyja 19 maja 2014 hoda pa padazreńni va ŭčynieńni karupcyjnych złačynstvaŭ. Nijakich padrabiaznaściaŭ spravy SK nie ab`iaŭlaŭ. Śledstva ciahnułasia bolš jak hod.
Pieršy namieśnik staršyni abłvykankama abvinavačvajecca va ŭčynieńni złačynstvaŭ, praduhledžanych č. 3 art. 426 KK (pieravyšeńnie ŭłady abo słužbovych paŭnamoctvaŭ). Namieśnik staršyni abłvykankama abvinavačvajecca pa anałahičnym artykule, a taksama č. 6 art. 16 art. 209 KK (dapamahańnie ŭ złačynstvie, machlarstva), i č. 5 art. 16 art. 424, art. 426 KK (padbuchtorvańnie da ŭčynieńnia złačynstva, pieravyšeńnie ŭłady, złoŭžyvańnie ŭładaj).
Syn namieśnika staršyni abłvykankama, dyrektar pryvatnaj firmy, abvinavačvajecca pa č. 2 art. 216 KK (naniasieńnie majomasnaha ŭronu biez prykmietaŭ kradziažu), č. 4 art. 209 KK (machlarstva hrupaj asob abo ŭ bujnym pamiery), č. 5 art. 16 č. 3 art. 426 KK, č. 5. art. 16 art. 424 KK (padbuchtorvańnie da ŭčynieńnia pieravyšeńnia ŭłady i złoŭžyvańnia ŭładaj).
Były kiraŭnik chołdynhu «Homielskaja miasa-małočnaja kampanija» abvinavačvajecca pa č. 3 art. 424 KK (złoŭžyvańnie ŭładaj).
Hramadzianka RF, indyvidualny pradprymalnik, abvinavačvajecca ŭ machlarstvie, naniasieńni majomasnaha ŭronu, padbuchtorvańni da ŭčynieńnia karupcyjnych złačynstvaŭ. Jaje muž, taksama rasijanin, dyrektar firmy, abvinavačvajecca pa anałahičnych artykułach.
U lipieni 2015 hoda były kiraŭnik chołdynhu «Homielskaja miasa-małočnaja kampanija» byŭ pryhavorany ŭ Homieli za złoŭžyvańnie ŭładaj i pieravyšeńnie ŭłady da piaci hadoŭ pazbaŭleńnia voli. Jamu stavilisia ŭ vinu złačynstvy, učynienyja ŭ 2012—2013 hodzie, kali jon zajmaŭ pasadu namieśnika staršyni Homielskaha rajvykankama. Byłoha čynoŭnika abvinavačvali ŭ niezakonnym adčužeńni majomaści AAT «Homielski rajahraservis».
