Staličnaja «Dynama» sastupiła i ŭ druhim matčy hrupavoha turnira Lihi Jeŭropy pa futbole. Na hety raz aŭstryjskamu «Rapidu». Naš supiernik na dadzieny momant lidziruje va ŭnutranym pieršynstvie, a ŭ startavaj hulni LE pieramoh ispanski «Viljareał».
Fota Siarhieja Zinina.
Z Aŭstryi padtrymać «Rapid» pryjechała kala čatyroch sotniaŭ fanataŭ. «Zialony» siektar byŭ samy šumny, strakaty. «Rapid» nibyta hulaŭ doma, bo fanaty «Dynama» jaki ŭžo miesiac bajkatujuć hulni. Ahułam na trybunach «Barysaŭ-Areny» sabrałasia kala 5 tysiač hledačoŭ.
Minskaje «Dynama» ciapier u kryzisie. Kamanda nie moža pieramahčy ciaham siami hulniaŭ. Zdavałasia b, jašče zusim niadaŭna saśpiavała intryha ŭ baraćbie za zołata ŭnutranaha pieršynstva, a ciapier dobra, kali «Dynama» zachavaje srebra ŭ zmahańni z «Minskam».
Daŭno nie zabivaŭ lidar atak minčukoŭ Fatas Biečyraj. U abaroncy Umaru Banhury niadaŭna ŭ asabistym žyćci zdaryłasia trahiedyi – zahinuŭ brat. Nie vydaje dobrych matčaŭ Uładzimir Karyćka. U takich składanych umovach stanoŭčyja emocyi kamadzie Juryja Čyža byli prosta nieabchodnyja.
Pieršy tajm pakazaŭ, što asabliva bajacca aŭstryjcaŭ nie varta. Jany i sami krychu pabojvalisia biełarusaŭ, «Dynama» ž jakraz i trapiła ŭ hrupu paśla pieramohi aŭstryjskaha «Red Buła». Pieršaja realnaja pahroza ŭźnikła ŭ siaredzinie pieršaha tajma, kali Udodžy vyvieŭ Biečyraja adzin na adzin z bramnikam «Rapida». Na žal, naš čarnahorac schibiŭ.
Napeŭna, najlepšym u składzie «Dynama» byŭ jakraz naturalizavany bałharyn Čyhozie Udodžy, jaki chandryŭ u pačatku siezonie. Vosień lehijanier sustreŭ u niakiepskaj formie. Mienavita Udodžy ŭ druhim tajmie ŭpuściŭ viarniak «Dynama», kali patrapiŭ u štanhu.
Na toj momant «Rapid» užo vyjhravaŭ 1:0. Na 54-aj chvilinie partniory vykłali miač pad udar Štefanu Chofmanu, i niemiec-vieteran svoj šaniec nie ŭpuściŭ.
Varta adznačyć, što minskaje «Dynama» za matč tak i nie naniesła nivodnaha ŭdara ŭ stvor varot «Rapida» (štanha nie ličycca, bo heta nie sejv bramnika). Pieramahać biez udaraŭ niemahčyma. I ŭsio paraza davoli kryŭdnaja, bo było adčuvańnie, što ŭ hetym matčy minčuki mahli vycisnuć bolšaje.
U druhim matčy našaj hrupy «Viljareał» vyjhraŭ češskuju «Viktoryju» – 1:0. Takim čynam paśla dvuch turaŭ turnirnaje stanovišča nastupnaje: «Rapid» – 6 punktaŭ, «Viljareał», «Viktoryja» – pa 3, «Dynama» – 0.
Nastupnuju hulniu «Dynama» praviadzie na «Barysaŭ-Arenie» 22 kastryčnika z «Viljareałam».
