Centrvybarkam admoviŭsia vydzielić dadatkovy efirny čas kandydatu ŭ prezidenty Taćcianie Karatkievič.
Karatkievič prasiła CVK dać joj efirny čas, nie vykarystany kandydatam u prezidenty Alaksandram Łukašenkam, na padstavie zajavy, jakuju jon zrabiŭ 25 vieraśnia. Naviedvajučy ŭ toj dzień Biełaruski mietałurhičny zavod, kiraŭnik dziaržavy skazaŭ, što moža «padaryć» svoj niavykarystany efirny čas, «kali kamuści treba». «Ale, samaje cikavaje, jany nie chočuć bolš», — dadaŭ jon, kažučy ab inšych kandydatach.
«Paśla dvuch vystupleńniaŭ na TB Taćciany Karatkievič byli šmatlikija zvaroty hramadzian z prośbaj vystupić jašče i raskazać pra roznyja prablemy, jakija jość siońnia ŭ Biełarusi, i prapanavać šlachi ich vyrašeńnia», — havorycca ŭ zvarocie Karatkievič u CVK.
Na siońniašnim pasiadžeńni sakratar CVK Mikałaj Łazavik adznačyŭ, što farmalnych padstaŭ dla razhladu pytańnia nie chapaje, bo niama aficyjnaj zajavy Alaksandra Łukašenki ab tym, što jon addaje svoj efirny čas. «Navat kali b my chacieli kamuści pieradać efirny čas, my b nie zmahli heta zrabić u adpaviednaści z zakanadaŭstvam. Efirny čas naležyć nie Centrvybarkamu, a Biełteleradyjokampanii», — skazaŭ Łazavik.
Jon taksama adznačyŭ, što ŭ adpaviednaści z zakanadaŭstvam niavykarystany čas nie padlahaje adnaŭleńniu, a pieradača času stvaryła b roznyja mahčymaści dla kandydataŭ.
Taksama Centrvybarkam admoviŭ u zadavalnieńni i druhoj skarhi Taćciany Karatkievič z patrabavańniem vynieści papiaredžańnie inšamu kandydatu — Alaksandru Łukašenku.
Skarha tyčycca zvarotu da armii Aficerskaha schodu Uzbrojenych sił Biełarusi. Delehaty 5-ha Aficerskaha schodu Uzbrojenych sił, jaki prajšoŭ 25 vieraśnia ŭ Minsku, pryniali zvarot da ŭsich vajennasłužačych i členaŭ ich siemjaŭ z zaklikam «vykazać usialakuju padtrymku na vybarach hałoŭnakamandujučamu Uzbrojenymi siłami prezidentu Respubliki Biełaruś A.R.Łukašenku».
Karatkievič ličyć, što takim čynam Łukašenka, jak hałoŭnakamandujučy, vykarystaŭ administracyjny resurs dla ŭłasnaj padtrymki.
Pradstaŭnik Ministerstva abarony na pasiadžeńni CVK rastłumačyŭ, što Aficerski schod źjaŭlajecca adnym ź mierapryjemstvaŭ padrychtoŭki Uzbrojenych sił, jakoje zaćviardžajecca nie prezidentam, a ministram abarony.
Pa-druhoje, adznačyŭ jon, pytańnie zvarotu ŭ paradak dnia nie ŭklučałasia, da jaho nie majuć dačynieńnia ni Łukašenka, ni jaho kamanda. Pry hetym jon padkreśliŭ, što aficery majuć roŭnyja pravy ź inšymi hramadzianami Biełarusi, i im nie mohuć admović u pravie vykazvać svajo mierkavańnie.
Sakratar Centrvybarkama Mikałaj Łazavik źviarnuŭ uvahu na toje, što pryniaćcie zvarotu było inicyjatyvaj schodu, pry hetym da jaje nie maje nijakaha dačynieńnia kamanda Łukašenki.
Centralnaja kamisija admoviła ŭ zadavalnieńni skarhi adnahałosna.
