U biełaruskaha naroda vypracavany imunitet suprać nasilla, a asnova našaj zamiežnaj palityki — miralubstva, zajaviŭ Alaksandr Łukašenka, vystupajučy viečaram 2 kastryčnika na ŭračystym mierapryjemstvie «Malitva za Biełaruś».

Łukašenka i try jaho syny — Viktar, Dźmitryj i Mikałaj — uziali ŭdzieł u cyrymonii pachavańnia kapsuł ź ziamloj ź miescaŭ, dzie znachodziacca mahiły biełaruskich voinaŭ, zahinułych u hady Vialikaj Ajčynnaj vajna. Jana prajšła ŭ krypcie chrama-pomnika ŭ honar Usich Śviatych. 

Pobač z Łukašenkam znachodzilisia kiraŭniki čatyroch kanfiesij: mitrapalit Pavieł, mitrapalit Minska-Mahiloŭskaj archidyjacezii Rymska-katalickaj carkvy ŭ Biełarusi arcybiskup Tadevuš Kandrusievič, staršynia Musulmanskaha relihijnaha abjadnańnia ŭ Biełarusi mufcij Abu-Biekir Šabanovič i staršynia Iudziejskaha relihijnaha abjadnańnia ŭ Biełarusi Ryhor Chajtovič.

Prysutničali taksama kiraŭniki dypłamatyčnych pradstaŭnictvaŭ zamiežnych dziaržaŭ — Rasii, Hiermanii, Aŭstryi, Polščy, Vienhryi, Čechii, Słavakii i Italii.

U liku čynoŭnikaŭ i lidaraŭ hramadskich arhanizacyj, zaŭvažanych na placoŭcy kala chrama padčas cyrymonii, byli ministr kultury Barys Śviatłoŭ, pieršy sakratar BRSM Andrej Bielakoŭ, kiraŭnik Fiederacyi prafsajuzaŭ Biełarusi Michaił Orda, ministr adukacyi Michaił Žuraŭkoŭ, ministr pracy i sacabarony Maryjana Ščotkina, vice-premjer Michaił Rusy, vice-premjer Natalla Kačanava, namieśnik staršyni Minharvykankama Ihar Karpienka.

Paśla vychadu Łukašenki z chrama słova ŭziaŭ mitrapalit Pavieł, jaki ad imia ŭsich pravasłaŭnych vykazaŭ «malitoŭnuju padtrymku» palitycy, što pravodzicca kiraŭnikom dziaržavy. Biełaruś, skazaŭ Pavieł, staić na parozie važnaha vybaru. «My za mir i roskvit. Niachaj kvitnieje naša Biełaruś», — skazaŭ mitrapalit. 

Zatym pierad prysutnymi vystupiŭ Łukašenka, jaki padkreśliŭ važnaść pamiaci pra zahinułych, što vajavali za vyzvaleńnie śvietu «ad karyčnievaj čumy». 

«Siońnia ziamny šar raskołvajecca ad kryvavych kanfliktaŭ. U mižusobnuju bojniu ŭciahnuli navat našych susiedziaŭ, bratoŭ-ukraincaŭ. Jany dziasiatkami tysiač biahuć ad vajny, u tym liku i da nas. Raspoviedy biežancaŭ časam vyklikajuć žach», — skazaŭ kiraŭnik dziaržavy.

«Apošnim časam čuju roznyja insinuacyi i manipulacyi ad našych hramadzian, ale heta adzinki hramadzian, jakija situacyju va Ukrainie chočuć paviarnuć unutr Biełarusi», — dadaŭ jon.

«Kali vajna, nie majuć značeńnia ni pradukty, ni ceny. Spytajcie ŭ biežancaŭ. My sami ŭsio možam zrabić, svaimi rukami, hałoŭnaje — mir i spakoj. Mir — heta samaje darahoje, što moža być dla roskvitu i prahresu», — padkreśliŭ kiraŭnik dziaržavy. 

Jon upeŭnieny, što na biełaruskaj ziamli budzie zabiaśpiečany mir. «Biełaruskaj dziaržavie być viečna. My nikomu nikoli nie addadzim ni piadzi svajoj ziamli, pry hetym nie pretendujučy na čužuju», — skazaŭ Łukašenka.

Jon zaznačyŭ, što Biełaruś vielmi časta stanaviłasia pierakryžavańniem, na jakim u śmiarotnaj bitvie sychodzilisia armii vajujučych dziaržaŭ. «Naš narod vynies stolki pakutaŭ, što nazaŭsiody vypracavaŭ u sabie imunitet suprać usiakaha nasilla. I zaraz asnova našaj zamiežnaj palityki — miralubstva», — zajaviŭ kiraŭnik dziaržavy.

Jak raniej paviedamlaŭ aficyjny partał Biełaruskaha ekzarchata Ruskaj pravasłaŭnaj carkvy, u krypcie chrama pachavanyja siem kapsuł ź ziamloj ź miescaŭ, dzie znachodziacca mahiły biełaruskich voinaŭ, zahinułych u hady Vialikaj Ajčynnaj vajny. Ziamla pryviezienaja z Aŭstryi, Vienhryi, Hiermanii, Italii, Polščy, Słavakii i Čechii.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?