Navučenka Mienskaha rajonnaha liceju ŭ Ratamcy paprasiła siastru dapamahčy napisać ese na temu «Što budzie, kali Ameryka stanie kiravać śvietam». Kaleha siastry, daviedaŭšysia pra takoje zadańnie, źbirajecca pisać skarhu ŭ dziaržaŭnyja orhany na toje, što vučniaŭ schilajuć da varožaha staŭleńnia da ZŠA.
discovery.com
«Pra zadańnie my daviedalisia ad liceistaŭ. 11-klaśniki atrymali jaho ŭ ramkach pradmieta «Suśvietnaja historyja». Było nieabchodna napisać ese na temu: «Što budzie, kali Ameryka stanie kiravać śvietam». Ad adnaho z navučencaŭ taksama pastupiła infarmacyja, što ese pavinna nakiroŭvacca ŭ adździeł idealohii dla vyśviatleńnia ŭzroŭniu patryjatyzmu ŭ dziaciej», — paviedamiła Svabodzie kaleha svajački adnoj z 11-klaśnic liceju, jaki znachodzicca ŭ Ratamcy.
Liceistka paprasiła siastru dapamahčy vykanać zadańnie
Žančynu aburyła takoje zadańnie. Jana źbiraje infarmacyju, kab napisać skarhu ŭ dziaržaŭnyja orhany:
«Naŭrad ci nastaŭnik historyi budzie prosta tak davać padobnyja zadańni dzieciam. Jak praviła, takoje adbyvajecca na rasparadžeńnie źvierchu. My sprabujem vyśvietlić, ci byli padobnyja sytuacyi ŭ inšych navučalnych ustanovach, tamu što daviarać tolki słovam dziaciej składana. Razam z tym dzicia źviarnułasia da svajakoŭ z prośbaj dapamahčy napisać ese pra suśvietnaje daminavańnie ZŠA. Tamu takoje zadańnie sapraŭdy było dzieciam dadziena. Ja liču, što heta nia tolki absurdna, ale i amal złačynna. Kali heta nia vydumka adnaho nastaŭnika, a cełaja systema, to ja maju namier pisać skarhu ŭ orhany dziaržaŭnaha kiravańnia. Ja liču taki padychod złačynnym — i ŭ dačynieńni da dziaciej, i ŭ dačynieńni da sytuacyi ŭ cełym».
«Nastupnym krokam budzie vajna z ZŠA?»
Tłumačačy, u čym jana bačyć złačynnaść takoha zadańnia, žančyna skazała, što nastupnym krokam z boku pedahohaŭ moža być zaklik da zbrojnaha supraćstajańnia z Amerykaj:
«Pa-pieršaje, napisańnie padobnaha ese nia moža być indykataram patryjatyzmu. Heta nie instrument acenki ŭzroŭniu patryjatyzmu nia tolki ŭ dziaciej, ale i ŭ kaho zaŭhodna. Pa-druhoje, prapanoŭvać dzieciam takuju tematyku niedapuščalna, tamu što heta zakładaje ŭ ich hałovy ideju pra virtualnuju mahčymaść dla adnoj krainy kiravać usim śvietam. Takoha nie pavinna być. Ja liču, što heta niepedahahična. Asabliva siońnia, kali Biełaruś zajmaje pazycyju inicyjatara mirnaha ŭrehulavańnia kanfliktu va Ŭkrainie. Nielha padbuchtorvać da niepryjazi da adnoj krainy. Nastupnym krokam, vidać, budzie zaklik da vajny z Amerykaj».
Nastaŭnica historyi: Ja prosta raspaviała pra plany Abamy, a dzieci padumali, što havorka pra liderstva ZŠA
Radyjo Svaboda źviarnułasia da Kaciaryny Zacharavaj, nastaŭnicy historyi i hramadaznaŭstva ŭ Mienskim rajonnym licei ŭ Ratamcy, z prośbaj patłumačyć sutnaść zadańnia, jakoje aburyła svajakoŭ liceistki.
«U 11-m klasie pa suśvietnaj historyi my prachodzili temu, pryśviečanuju Złučanym Štatam Ameryki. Vyvučali ŭsich prezydentaŭ, charakternyja rysy ichniaj palityki. Na sučasnym etapie razhladali palityku Baraka Abamy — unutranaje i źniešniaje raźvićcio krainy. Ja raspaviała pra častku planaŭ ciapierašniaha prezydenta i dała zadańnie apisać svaje ŭražańni nakont budučyni Ameryki, zakranuŭšy źniešniepalityčnyja i ŭnutrypalityčnyja aspekty. Havorka nie viałasia ni pra jakaje liderstva ZŠA na suśvietnaj arenie. Ja prosta paprasiła, hruntujučysia na padadzienym materyjale, apisać svaje ŭražańni pra tendencyi ŭ raźvićci Ameryki. Vidać, dzieci zrazumieli tak, nibyta ja addaju pieravahu ZŠA. Ale ni ŭ jakim razie takoha nie było i być nie mahło».
Kaciaryna Zacharava skazała, što davała liceistam tolki tuju infarmacyju pra ZŠA, jakaja źmiaščajecca ŭ padručniku:
«Zakranałasia tolki toje, što praduhledžvajecca padručnikam pa suśvietnaj historyi, — uviadzieńnie vojskaŭ u Libiju, sposaby pieraadoleńnia kryzisnaj sytuacyi ŭnutry krainy, a taksama toje, jak arhanizoŭvajecca baraćba ź biespracoŭjem i biednaściu ŭ ZŠA. Ja paprasiła praanalizavać usio heta i skazać, nakolki efektyŭnyja palityčnyja pamknieńni Baraka Abamy».
Nastaŭnica padkreśliła, što zadańnie standartnaje i nie pavinna pieradavacca ŭ adździeł idealohii. Praviarać zadańni maje tolki jana sama.
