Na skryžavańni kala «Halerei Biełaj» u Biełastoku ŭstalavali kamieru videafiksacyi parušeńniaŭ. Z dapamohaj euroby.info raźbirajemsia, jak nie patrapić na štrafy z-za polskich śviatłaforaŭ i dzie ŭ Biełastoku ŭstalavanyja takija ž kamiery.
Z maja 2015 hoda ŭ Biełastoku pačała dziejničać sistema kantrolu za rucham transpartu, a ŭžo z červienia z dapamohaj jaje kamier fiksujuć parušeńni praviłaŭ darožnaha ruchu. Ale tolki ciapier parušalniki stali atrymlivać «listy ščaścia». U słužbie kantrolu za transpartam zajavili, što z dapamohaj videakamier pa stanie na vierasień było zafiksavana 26 tysiač parušeńniaŭ, ale pakul praanalizavanyja tolki 5 tysiač i 1,8 tysiačy kiroŭcaŭ byli vypisanyja štrafy za prajezd śviatłafora na «čyrvony». Biełarusam, jakija jeździać u Biełastok na asabistych aŭto, asabliva važna razumieć, što śviatłafory ŭ Polščy i Biełarusi pracujuć pa-roznamu.
Za prajezd skryžavańnia ŭ Polščy na čyrvony sihnał śviatłafora praduhledžany štraf 500 złotych.
U Biełastoku zaraz dziejničaje 5 kamier videafiksacyi parušeńniaŭ prajezdu pierakryžavańniaŭ na troch bujnych skryžavańniach:
1. kala HC «Halereja Biełaja»: skryžavańnie vuł. Miłaša — vuł. Branickaha — vuł. Piastoŭskaja / Miłosza — Branickiego — Piastowska
2. pobač z handlovym centram «Zialonaje Uzhorje»: skryžavańnie vuł. Vrocłaŭskaja — vuł. Papiałuški — vuł. Sikorskaha / Wrocławska — Popiełuszki — Sikorskiego
3. niedaloka ad čyhunačnych kalejaŭ na skryžavańni vuł. Papiałuški — vuł. Hietmanskaj / Popiełuszki — Hetmańska
Roźnica ŭ śviatłaforach Polščy i Biełarusi
Aŭtamabilistam, jakija pryjazdžajuć ź Biełarusi, varta bajacca polskich śviatłaforaŭ i pieraładžvać svoj styl kiravańnia. U Biełarusi paśla taho, jak źnikaje zialony sihnał śviatłafora, jašče na paru siekund źjaŭlajecca žoŭty. Heta dazvalaje tym, chto śpiašajecca, praskočyć pierakryžavańnie da źjaŭleńnia čyrvonaha sihnału. U Polščy taki numar nie projdzie. Śviatłafory naładžany pa-inšamu: paśla taho, jak źnikaje zialony, žoŭty źjaŭlajecca litaralna na siekundu, i kali vy pasprabujecie praskočyć pierakryžavańnie jak u Biełarusi, to najimavierniej užo budziecie pierasiakać darohu na čyrvony sihnał.
