Minekanomiki prahnazuje nievialiki rost VUP u 2016 hodzie, zajaviŭ pieršy namieśnik ministra ekanomiki Alaksandr Zabaroŭski 23 kastryčnika na mižnarodnaj kanfierencyi «Prablemy prahnazavańnia i dziaržaŭnaha rehulavańnia sacyjalna-ekanamičnaha raźvićcia», što prachodzić u Minsku.
«U 2016 hodzie pry suśvietnaj canie nafty 50 dołaraŭ za baral, kursie 63 rasijskija rubli za dołar my ŭ Minekanomiki bačym mahčymym nievialiki ekanamičny rost u 2016 hodzie», — skazaŭ Zabaroŭski.
U hutarcy z žurnalistami jon udakładniŭ, što ŭ nastupnym hodzie rost VUP prahnazujecca na ŭzroŭni 0,3%. «Prahnoznaja acenka pa canie na naftu 50 dołaraŭ za baral źjaŭlajecca bazavaj dla ŭsich prahnoznych dakumientaŭ. Jana zakładzienaja, u pryvatnaści, u biudžet na nastupny hod», — skazaŭ namieśnik ministra.
Pavodle słoŭ Zabaroŭskaha, na najbližejšy hod ministerstva bačyć dźvie krynicy dla ekanamičnaha rostu. «Pieršy — ekspart. Valutnaja palityka, što pravodzicca, dazvalaje padtrymlivać kankurentazdolnaść pradukcyi i pavialičvać ekspart. Jašče adnu krynicu ekanamičnaha rostu my bačym u bolš intensiŭnym vykarystańni zamiežnych kredytnych resursaŭ», — adznačyŭ namieśnik ministra.
Akramia taho, na 2016 hod stavicca zadača zabiaśpiečyć nulavy deficyt płaciežnaha bałansu. «Za košt valutnaj vyručki i prytoku kapitału pa finansavym rachunku», — rastłumačyŭ Zabaroŭski.
Aficyjny prahnoz na 2015 hod praduhledžvaje rost VUP na ŭzroŭni 0,2—0,7%. U studzieni—vieraśni abjom VUP źniziŭsia ŭ paraŭnańni z anałahičnym pieryjadam 2014 hoda ŭ supastaŭnych cenach na 3,7%. U 2014 hodzie rost VUP skłaŭ 1,6% pry prahnozie 3,3%.
