Łondan časova prypyniŭ paloty ŭsich samalotaŭ, jakija nakiroŭvajucca ŭ Brytaniju ź jehipieckaha horada Šarm-eš-Šejch. Jak havorycca ŭ zajavie brytanskaha ŭrada, heta źviazana sa źjaŭleńniem novaj infarmacyi ab tym, što krušeńnie samalota avijakampanii «Kahałymavija» ŭ minułuju subotu mahło być vyklikana vybuchovaj pryładaj na borcie.
«Pakul idzie rasśledavańnie, my nie možam adnaznačna skazać, čamu upaŭ rasijski samalot. Ale z pastupleńniem novaj infarmacyi ŭ nas źjaviłasia zakłapočanaść u suviazi ź viersijaj pra toje, što da krušeńnia całkam mahła pryvieści vybuchovaja pryłada na jaho borcie», — havorycca ŭ zajavie Daŭninh-stryt.
Rašeńnie prypynić paloty było pryniata paśla telefonnaj razmovy pamiž premjer-ministram Brytanii Devidam Kemieranam i prezidentam Jehipta Abdel Fatacham as-Sisi, u jakim abmiarkoŭvalisia miery biaśpieki ŭ jehipieckim aeraporcie. Va ŭradzie Brytanii padkreślivajuć, što abmiežavańnie pakul tyčycca tolki rejsaŭ, jakija vylatajuć z Šarm-eš-Šejcha ŭ Łondan u sieradu ŭviečary.
Jak paviedamlajecca, u Jehipiet vylecieła hrupa brytanskich ekśpiertaŭ dla acenki situacyi ŭ aeraporcie. Paśla taho, jak acenka budzie praviedziena, urad vyznačycca z dalejšymi mierami. Da taho, jak jana budzie praviedziena, vylety pravodzicca nie buduć.
Na Daŭninh-stryt asobna padkreślili, što ŭradavaja acenka ŭzroŭniu biaśpieki Jehipta dla brytanskich turystaŭ pakul nie mianiajecca.
Paškodžanaja «čornaja skrynia»
Śledčyja analizujuć proby piasku na miescy katastrofy samalota A321 na Sinai z metaj ustalavać pryčyny jaho hibieli, paviedamiła Rejter krynica, blizkaja da rasśledavańnia.
Miarkujuć, što pryčynaj krušeńnia moh stać vybuch, adnak pakul nie jasna, što mienavita jaho vyklikała — uciečka paliva abo detanacyja bomby na borcie łajniera, adznačyła krynica ahienctva.
Śpiecyjalisty, jakija viaduć rasśledavańnie katastrofy, dastali dadzienyja z paramietryčnaha bartavoha samapisca, jaki fiksuje palotnuju infarmacyju, i spraŭdzili ich, havorycca ŭ aficyjnym paviedamleńni ministerstva hramadzianskaj avijacyi Jehipta, apublikavanym 4 listapada.
Ciapier dadzienyja budzie detalova analizavać śledstva.
Samapisiec u kabinie piłotaŭ častkova paškodžany, i spatrebicca vialikaja praca dla zdabyvańnia zapisaŭ, paviedamiła ministerstva.
Takim čynam, nijakich kamientaroŭ pra źmiest prybora rabić pakul nielha, adznačajuć avijacyjnyja ŭłady Jehipta.
Vyvučeńnie abłomkaŭ na miescy krušeńnia praciahvajecca.
Jehipiet uznačalvaje śledčyja dziejańni z udziełam akredytavanych pradstaŭnikoŭ Rasii (dziaržavy-apieratara), Irłandyi (dziaržavy rehistracyi), Francyi (dziaržavy-raspracoŭščyka avijałajniera) i Hiermanii (dziaržavy-vytvorcy).
