Pry pracedury nadhladu futbolnych zaŭziataraŭ buduć prysutničać pradstaŭniki fiederacyi — takoje adno z rašeńniaŭ, pryniatych na sustrečy staršyni Biełaruskaj fiederacyi futboła Siarhieja Rumasa i ministra ŭnutranych spraŭ Ihara Šunieviča, jakaja prajšła 11 listapada.
Pavodle źviestak upraŭleńnia infarmacyi i hramadskich suviaziaŭ MUS, Rumas «pryvioŭ niekalki prykładaŭ niekarektnych pavodzin milicyjanieraŭ na kantrolnych punktach propusku i akcentavaŭ uvahu na skarhach z boku fanataŭ». Šunievič «dapuściŭ najaŭnaść adzinkavych incydentaŭ u siłu čałaviečaha faktaru i asabistych jakaściej asobnych supracoŭnikaŭ». «Razam z tym časta publikacyi ŭ ŚMI, jakija tyčacca kanfliktaŭ «milicyjanier — fanat», nie zaŭsiody abjektyŭnyja. Dla vyrašeńnia hetaj prablemy ŭ dalejšym na nadhladnych mierapryjemstvach buduć prysutničać pradstaŭniki ABFF, jakija na svaje vočy zmohuć upeŭnicca ŭ niepraduziatych adnosinach pravaachoŭnikaŭ da hramadzian», — zaznačajecca ŭ pres-relizie.
«Pilnaja ŭvaha» była nadadzienaja bakami nieabchodnaści stvareńnia instytuta ściuardaŭ. Pavodle słoŭ Šunieviča, u hetym pytańni pazicyja MUS adnaznačnaja: milicyjanieraŭ unutry «čašy» padčas matčaŭ być nie pavinna.
Supracoŭniki milicyi pry hetym buduć tolki supravadžać spartyŭnaje mierapryjemstva i reahavać na jakija-niebudź zdareńni ŭžo pa prośbie ściuardaŭ. «Prapanova važnaja i patrebnaja — z hetym biezahavoračna pahadzilisia abodva baki. Ale pytańnie patrabuje detalovaj prapracoŭki, u pieršuju čarhu ŭ pravavym poli. Na pohlad udzielnikaŭ sustrečy, prasoŭvańniu hetaj inicyjatyvy dapamoža adpaviednaje apytańnie, raźmieščanaje na aficyjnym sajcie ABFF z metaj vyvučeńnia hramadskaj dumki», — havorycca ŭ paviedamleńni.
Razam z tym, pavodle słoŭ Šunieviča, pryniaćcie rašeńnia ab hetak zvanym supravadžeńni fanataŭ, a taksama achova hramadskaha paradku za miežami stadyjonaŭ zastanucca ŭ kampietencyi MUS, tamu što «heta ŭžo zakranaje intaresy nie tolki zaŭziataraŭ, ale i inšych hramadzian».
Fiederacyja vykazała hatoŭnaść da pryniaćcia «dyscyplinarnych rašeńniaŭ ab zabaronie naviedvańnia stadyjonaŭ asobam, jakija parušajuć ustanoŭlenyja praviły pavodzin», a taksama da farmiravańnia mižviedamasnaj rabočaj hrupy pa raspracoŭcy zakonaprajekta «Ab zaŭziatarach».
Udzielniki narady zakranuli pytańnie vykarystańnia padčas matčaŭ na stadyjonach roznaj simvoliki. Pradstaŭniki fiederacyi «padtrymali pazicyju MUS u supraćdziejańni źjaŭleńniu na trybunach roznych ekstremisckich, kalapalityčnych i radykalnych płakataŭ, banieraŭ i h.d.». Adnačasova baki pryznali, što na trybunach «isnuje deficyt nacyjanalnaj idei i aficyjnych dziaržaŭnych simvałaŭ».
U pieramovach uziali ŭdzieł taksama pieršy namieśnik staršyni BFF Siarhiej Safarjan, pradstaŭniki milicyi hramadskaj biaśpieki na čale z namieśnikam ministra ŭnutranych spraŭ Mikałajem Mielčankam, a taksama načalnik HUBAZiK MUS Mikałaj Karpienkaŭ.
Na ich dumku, realizacyja zhadanych inicyjatyŭ i damoŭlenaściaŭ «u nastupnym minimizuje kolkaść kanfliktaŭ pamiž supracoŭnikami milicyi i futbolnymi fanatami». Užo ŭ niadzielu, 15 listapada, «mnohija ź ich buduć «abkatanyja» na zaklučnych matčach futbolnaha siezona». Pa ŭsim vidać, razmova idzie ab apošnim tury ŭ pieršaj lizie.
***
Sustreču Rumasa i Šunieviča anansavaŭ Safarjan na sustrečy z žurnalistami 28 kastryčnika. Pryčynaj staŭ incydent na adboračnym matčy čempijanatu Jeŭropy 2016 hoda Biełaruś — Makiedonija, jaki adbyŭsia 12 kastryčnika na «Barysaŭ-Arenie». U pierapynku byli zatrymanyja i dastaŭlenyja ŭ Barysaŭski RAUS try zaŭziatary. Nastupnym dniom jany byli aštrafavanyja na 10 bazavych vieličyń (1,8 młn rubloŭ) kožny. Pavodle słoŭ zaŭziataraŭ, pravaachoŭniki pryčapilisia da šalikaŭ z vyjavaj histaryčnaha hierba «Pahonia», siłaviki śćviardžali, što fanaty znachodzilisia ŭ niećviarozym stanie i admaŭlalisia vykonvać ich zakonnyja patrabavańni. Paźniej kiraŭnik MUS zajaviŭ, što našeńnie simvoliki z hierbam «Pahonia» nie źjaŭlajecca pryčynaj dla pryciahnieńnia da adkaznaści. Fiederacyja futboła zajaviła, što biare incydent na kantrol. Pavodle słoŭ Safarjana, z MUS pastupiŭ list, dzie była «nie infarmacyja pa sutnaści, a, uvohule, niezadavolenaść našymi dziejańniami, što my nie padtrymlivajem dziejańni MUS, i paŭtorana, što zaŭziatary byli niećviarozyja i parušali hramadski paradak». «U hetym vypadku ŭźnikaje pytańnie, jak niećviarozyja praz kardony milicyi trapili na stadyjon, chto ich tudy prapuściŭ», — zaznačyŭ pradstaŭnik BFF.
Pavodle jaho słoŭ, u fiederacyi jość prapanova, «jakuju MUS pakul nie pačuŭ i nie choča čuć». «My prapanoŭvajem stvaryć miechanizm, kab u nastupnym takich incydentaŭ nie ŭźnikała, kab abodva baki viedali, što jość treci bok, jaki budzie aceńvać hetu situacyju abjektyŭna, nie addajučy jakoha-niebudź pryjarytetu tamu ci inšamu boku. Buduć davać pakazańni nie pradstaŭniki AMAP u sudzie, a ludzi, jakija nie zacikaŭlenyja zajmać čyjści bok», — zajaviŭ Safarjan.
«Datul, pakul takija situacyi ŭ pryncypie mahčymyja, zaŭziataraŭ na stadyjonach budzie mienš, a staŭleńnie da milicyi nie palepšycca, — skazaŭ pradstaŭnik fiederacyi. — Dva hetyja pytańni treba vyrašać: pavialičvać kolkaść zaŭziataraŭ na trybunach i palapšać staŭleńnie milicyi da našych zaŭziataraŭ. Jany nie złačyncy».
Paśla taho jak z boku zaŭziataraŭ na MUS abrynułasia chvala krytyki, u zvodkach ministerstva pačaścilisia paviedamleńni ab pravaparušeńniach, učynienych fanatami ŭ niefutbolnaj śfiery.
