Ihar Poršnieŭ zajmaje pasadu hiendyrektara «Biełaruśfilma» treci miesiac. Niahledziačy na heta, da jaho nazapasiłasia niamała pytańniaŭ. Naviny.by pasprabavali vyśvietlić, čamu novy hiendyrektar kinastudyi nie adkazvaje na abvinavačvańni kaleh pa cechu.
Ministr kultury Barys Śviatłoŭ pradstaŭlaje Ihara Poršnieva na pasadzie. Fota belarusfilm.by
Ihar Poršnieŭ byŭ pryznačany hienieralnym dyrektaram «Biełaruśfilma» 27 žniŭnia, u razhar respublikanskaha konkursu na vytvorčaść nacyjanalnych filmaŭ.
Čamu Poršnieva pryznačyli hiendyrektaram «Biełaruśfilma»?
Jaho papiarednik Aleh Silvanovič na hetaj pasadzie adpracavaŭ čatyry hady i nieadnarazova padviarhaŭsia krytycy. Pa-pieršaje, maštabnaja rekanstrukcyja kinastudyi pry im tak i nie była zavieršanaja. Kab trapić u administracyjny korpus «Biełaruśfilma», da hetaha času treba prabiracca praz dvary, iści pa draŭlanych mastkach. Pa-druhoje, akupnaść pradukcyi «Biełaruśfilma» pa-raniejšamu nie zadavalniaje dziaržavu. Pa-treciaje, jak u litaratury nie stvaryli «svaju «Vajnu i mir», tak i ŭ kino nie źjaviŭsia svoj naminant na «Oskar».
Pakolki ŭ Biełarusi pryznačeńnie vyšejšych słužbovych asob i kiraŭnikoŭ respublikanskich arhanizacyj — praces niepubličny, pra kankurentaŭ Ihara Poršnieva mała što viadoma. Ab mahčymym pryznačeńni zajaŭlaŭ režysior i ścienaryst Andrej Hołubieŭ:
«U krasaviku hetaha hoda ja prajšoŭ usie pravierki, atrymaŭ patrebnyja rekamiendacyi, zakryŭ svaju studyju i čakaŭ, kali mianie pryznačać hienieralnym dyrektaram ci chacia b mastackim kiraŭnikom, jak mnie kazaŭ Śviatłoŭ. Ale kinastudyju ŭznačaliŭ Ihar Poršnieŭ, mnie ničoha nie patłumačyli. Užo ciapier ja razumieju, što hraŭ rolu masoŭki, kab nibyta było z kaho vybirać». Ciapier Hołubieŭ śćviardžaje, što Poršnieŭ nie prosta zaniaŭ jaho miesca na kinastudyi, ale i addaŭ jaho prajekt «Ślady na vadzie» rasiejskamu režysioru Jahoru Kančałoŭskamu.
Jość dźvie viersii, čamu Ihar Poršnieŭ uznačaliŭ «Biełaruśfilm».
Viersija pieršaja — pryznačeńnie łabiravaŭ asabista ministr kultury Barys Śviatłoŭ. Kažuć, jaho baćka, režysior Uładzimir Śviatłoŭ, byŭ dobra znajomy z Valancinam Poršnievym, dyrektaram mnohich stužak i baćkam ciapierašniaha kiraŭnika nacyjanalnaj kinastudyi. Poršnieŭ-małodšy svajo znajomstva ź ministram nie admaŭlaje, ale kaža, što jany tolki časam bačylisia, pra siabroŭstva havorki nie idzie.
Zrešty, stanovišča samoha Barysa Śviatłova va ŭradzie ciapier naŭrad ci možna nazvać stabilnym. Paśla taho, jak jon pryznaŭsia, što mantavaŭ pravalny, na dumku hledačoŭ i kinakrytykaŭ, film «My, braty…», u presie źjaviłasia infarmacyja, što ŭ bližejšy čas ministr adpravicca pasłom abo ŭ Małdovu, abo ŭ Tadžykistan. Papiaredni ministr kultury, nahadajem, praciahnuŭ karjeru pasłom u Francyi.
Druhaja viersija pryznačeńnia Ihara Poršnieva — u pačatku 2000-ch jon źjechaŭ u Maskvu, šmat hadoŭ pracavaŭ u pryvatnych kampanijach, na rasijskim telebačańni. Jon viedaje, jak pryciahvać hrošy, i viedaje, što takoje zapatrabavanaje kino. Hetaha šmat hadoŭ i damahajucca čynoŭniki ad «Biełaruśfilma».
Dla Minkulta hałoŭnaje pytańnie — chto kupić biełaruskaje kino?
U Rasii Ministerstva kultury padtrymlivaje debiutnaje, ekśpierymientalnaje kino. Na kamiercyjnyja prajekty hrošy vyłučaje Fond kino.
U Biełarusi pytańnie «chto kupić film» — adno z hałoŭnych. Udzielniki respublikanskaha konkursu pavinny dać kamisii płan kamiercyjnaj realizacyi filma na praciahu troch hadoŭ z dnia jaho stvareńnia. I miaža maraŭ siońnia — pradać film rasiejskamu telekanału. Mienavita tamu rasijskija kinazorki choć by naminalna, ale pradstaŭlenyja ŭ biełaruskich sieryjałach.
I zaprašajučy Jahora Kančałoŭskaha na rolu režysiora filma «Ślady na vadzie», nichto nie chavaje, što pad jaho imia ŭ Rasii značna bolš achvotna daduć hrošy, čym pad imia Andreja Hołubieva. I, padobna, u bližejšy čas hetaja situacyja zachavajecca.
Ź pieršych zajaŭ novaha hiendyrektara «Biełaruśfilma» vynikaje, što pieršačarhovaja zadača — rekanstrukcyja kinastudyi. Bolš uvahi ciapier abiacajecca nadavać maładym režysioram. Taksama Poršnieŭ maryć zrabić kinaalmanach pra Minsk. U Jahora Kančałoŭskaha, darečy, vialiki dośvied u hetaj spravie — u jaho filmahrafii jość takija stužki, jak «Maskva, ja lublu ciabie», «Majo serca — Astana», «Baku, ja lublu ciabie».
Vykanaŭčy pradziusar
Ihar Poršnieŭ naradziŭsia ŭ Minsku. Jak akcior jon naŭrad ci zapomniŭsia hledaču — syhraŭ mała i ŭ epizadyčnych rolach. Ale paśpieŭ papracavać vykanaŭčym pradziusaram na ORT, RTR, NTV. Byŭ namieśnikam dyrektara «NTV-kino». Praŭda, usiaho adzin hod.
Na «Biełaruśfilmie», pavodle jaho słoŭ, jon viedaje kožny kut. Jaho baćka doŭhi čas pracavaŭ na kinastudyi, tak što Ihar Poršnieŭ tut byŭ častym hościem. Jon i sam prapracavaŭ na «Biełaruśfilmie» amal 20 hadoŭ, pakul nie pierabraŭsia ŭ Maskvu.
Poršnaŭ admaŭlajecca adkazvać na pytańni, davać intervju i kazać pra kanflikt z Hołubievym.
«Dva tydni paśla pryznačeńnia ja kamunikavaŭ z žurnalistami. Mnie treba zajmacca spravaj, a nie razmovami. Praz hod pryjdziecie na kinastudyju i pabačycie, što ja paśpieŭ źmianić», — adznačaje Ihar Poršnieŭ.
Z razmovy składvajecca ŭražańnie, što novy hiendyrektar «Biełaruśfilma» nie vielmi padzialaje Rasiju i Biełaruś, choć robić ahavorku na apošniuju pramovu Łukašenki pra toje, što my samastojnaja nacyja i nie treba stavić vybar pamiž Uschodam i Zachadam.
Biełaruś jon, darečy, nazyvaje «Biełarusijaj». A jaho małodšyja dzieci vyzvalenyja ŭ himnazii ad vyvučeńnia biełaruskaj movy.
Čytajcie taksama: Zdymaŭsia ŭ treciaradnych rasijskich sieryjałach, pracavaŭ na NTV i RTR. Piać faktaŭ pra novaha kiraŭnika «Biełaruśfilma»
